Almatyda áıeldi tonaǵan qaraqshylar ustaldy
ALMATY. QazAqparat – Almaty qalasynda áıeldi tonaǵan eki er adam ustaldy, dep habarlaıdy QazAqparat tilshisi.
Medeý aýdandyq polıtsııa basqarmasynyń baspasóz qyzmetinen túsken málimetke qaraǵanda, kúdiktiler buryn birneshe ret sotty bolǵan 34 jastaǵy A. jáne 44 jastaǵy T. esimdi azamat. Olar áıelderdi tonaý úshin aldyn ala kelisim boıynsha bazarǵa kelgen. Sosyn Maqataev pen Zenkov kóshesiniń qıylysynda turyp, ótip bara jatqan adamdar arasynda altyn alqasy bar áıelderdi izdegen.
«Kúdiktiler áıeldiń artqy jaǵynan júgirip kelip, alqany julyp áketken. Sodan keıin olar qylmys ornynan boı tasalaǵan. Biraq osy joly olar alysqa uzap kete almady. Olardy bizdiń bólimniń qyzmetkerleri izin sýytpaı ustady. Kúdiktilerdiń biri buryn Túrksib aımaǵynda osyǵan uqsas qylmysy úshin sottalǵan. Onyń esirtkige táýeldi ekeni anyqtaldy», - dedi Medeý aýdandyq polıtsııa basqarmasynyń bastyǵy Dáýren Ótebaev.
Qazirgi ýaqytta kúdiktiler Almaty qalasy Polıtsııa departamentiniń ýaqytsha ustaý ızolıatoryna qamaldy. Olardyń ústinen Qylmystyq kodekstiń 191-baby boıynsha sotqa deıingi tergeý bastaldy.
