Almatyda áıeldi soqqyǵa jyqqan: polıtsııa eki bap boıynsha tergeýdi bastady
ALMATY. QazAqparat - Almaty polıtsııasy áıeldi uryp-soǵyp jáne zorlaýǵa áreket jasaǵan er adamdarǵa qatysty tergeýdi bastady, dep habarlaıdy QazAqparat tilshisi.
«2019 jyly 29 jeltoqsan kúni J. esimdi azamatsha Túrksib aýdandyq polıtsııa basqarmasyna aryzdanǵan. Bul fakt sotqa deıingi tergeýdiń biryńǵaı tiziliminde QR Qylmystyq kodeksiniń 24- babynyń 3- bóligi jáne 120 baby (zorlaý) boıynsha tirkeldi», - dep habarlady Almaty qalalyq PD baspasóz qyzmeti.
Oqıǵanyń mán-jaıyn anyqtaý úshin jedel tergeý toby quryldy. Kúdiktiler belgili boldy.
«Azamatsha J-nyń alǵan jaraqatynyń aýyrlyǵyn anyqtaý úshin sot-medıtsınalyq saraptama taǵaıyndaldy. Sonymen birge, jábirlenýshi polıtsııaǵa shaǵymdanǵan kúni S. esimdi azamatqa aryzdanýdan bas tartyp, qarsy shaǵym jazǵanyn atap ótken jón», - dep tolyqtyrdy Almaty qalalyq PD baspasóz qyzmeti
Esterińizge sala keteıik, jumys ornyna eńbekaqysyn alýǵa kelgen úsh balasy bar áıeldi áriptesteri uryp-soqqan bolatyn.
