Almatyda áıeldi pyshaqpen qorqytyp, tonamaq bolǵan adam ustaldy
ALMATY. QazAqparat- Almaty polıtseıleri áıelge qaraqshylyq shabýyl jasaǵan er adamdy ustady, dep habarlaıdy QazAqparat tilshisi.
Almaty qalalyq Polıtsııa departamenti taratqan málimetke sáıkes, Bostandyq aýdany Radostovets kóshesindegi úılerdiń birinen «102» pýltine saǵat 00:50-de qońyraý kelip túsken. Onda kórshi páterden kómek surap aıqaılaǵan daýysty estigeni aıtylǵan.
«Biz sol mekenjaıǵa dereý jettik. Úıdegi adam esikti ashpaı, eshqandaı kómek kerek emes ekenin aıtty. Biraq, áıeldiń daýysy úreıli bolyp kórindi. Sondyqtan máseleniń anyq-qanyǵyna kóz jetkizbeı, oqıǵa ornynan ketpedik. Al esikti ashýdy suraǵanda, eshkim jaýap qatpady. Áriptesim kilt sańylaýynan qaraǵanda betperde kıgen er adamnyń áıeldiń tamaǵyna pyshaqty taqap turǵanyn baıqady» - dedi Almaty qalalyq PD Jol-patrýldik polıtsııa polkiniń ınspektory Nurdos Turlybek. Osydan soń polıtsııa úıge kirip, kúdiktini ustaǵan.
Tekserý barysynda kúdiktiniń buryn tórt ret sottalǵany anyqtaldy.
Qalalyq krımınaldyq polıtsııanyń málimetinshe, kúdikti kóshede qyzdyń sońynan túsip, onyń páterine basa-kóktep kirgen. Úıde eshkim bolmaǵan.
«Ol pyshaqpen qorqytyp, jábirlenýshiden qundy zattary men aqsha berýdi talap etken. Alaıda kórshiniń der kezinde habar berýi arqasynda qaskóıdiń qylmysy iske aspady. Ol qamaýǵa alyndy. Qylmystyq is Bostandyq aýdandyq polıtsııa basqarmasynda tergelýde. Oqıǵa ornynan zattaı aıǵaqtar alynyp, is materıaldaryna tirkeldi», – dedi Almaty qalalyq PD krımınaldyq polıtsııa basqarmasynyń bastyǵy Erkin Іńkárov.
