Almatyda áıeldi qaqqan avtobýs júrgizýshisiniń kýáligi jalǵan bolyp shyqty

ALMATY. QazAqparat – Almatyda jaıaý adamdy qaǵyp ketken avtobýs júrgizýshisi júrgizýshi kýáligin qoldan jasaǵany anyqtaldy, dep habarlaıdy QazAqparat tilshisi.

«Tergeý barysynda júrgizýshiniń júrgizýshi kýáligi kúmán týdyrdy. Arnaıy saraptama onyń jalǵandyǵyn anyqtady. Bul fakti taǵy bir qylmystyq isti tirkeýge negiz boldy. Jaqynda sot úkimi shyqty», - dedi Almaty qalasy Polıtsııa departamenti anyqtaý basqarmasynyń bastyǵy Oljas Sháripov.
Medeý aýdanynyń №2 sotynyń qaýlysymen 29 jastaǵy azamat J. QR Qylmystyq kodeksiniń 385-baby 2,3-bóligi boıynsha qylmystyq quqyq buzýshylyq jasaǵany úshin kináli dep tanylyp, eki jylǵa bas bostandyǵyn shekteý jáne 80 saǵat qoǵamdyq jumysqa tartý jazasyna kesildi.
Polıtsııa ókiliniń aıtýynsha, qoǵamdyq kólik júrgizýshisi 2022 jyldyń qazan aıynda Tóle bı dańǵylymen shyǵys baǵytta kele jatyp, belgilenbegen jerden joldyń ońtústigine qaraı ótip bara jatqan áıeldi qaǵyp ketken. Sot-medıtsınalyq saraptamanyń qorytyndysyna sáıkes, jol-kólik apaty saldarynan onyń densaýlyǵyna aýyr zııan kelgen.