Almatyda áıeldi qaǵyp, mert qylǵan polıtseı kinásin tolyq moıyndady
ALMATY. QazAqparat – Almaty polıtsııa departamentiniń baspasóz qyzmeti áıeldi qaǵyp, mert qylǵan polıtseıden jaýap alý sátiniń vıdeosyn jarııalady, dep habarlaıdy QazAqparat tilshisi.
Almaty qalalyq patrýldik polıtsııa polkiniń ınspektory Baqtııar Tóleýtaı jol-kólik oqıǵasynyń mán-jaıyn aıtty.
«Búgin saǵat 6:45 shamasynda Ótemisuly kóshesimen ońtústik baǵytqa qaraı ketip bara jatqanymda, aldymdaǵy avtokólik solǵa qaraı burylmaq bolyp, men ol avtokólikten qashyp, jol-kólik oqıǵasyn boldyrmaý úshin kólik jýý jaqqa burylyp kettim. Sol kezde aldymda turǵan áıel adamdy baıqaýsyzda qaǵyp kettim», - dedi ol.
Polıtseı kinásin tolyq moıyndady, ol marqumnyń otbasyna qaıǵyryp kóńil aıtty.
Buǵan deıin bul derek Qylmystyq kodekstiń 345-baby boıynsha tirkelgeni habarlanǵan edi. Іs Almaty Polıtsııa departamentiniń anyqtaý basqarmasynyń óndirisinde. Júrgizýshimen tergeý sharalary júrgizilip jatyr.
Eske salaıyq, qaıǵyly oqıǵa 14 maýsymda tańerteń Alataý aýdanynda bolǵan.
