Almatyda áıelderge qatysty turmystyq zorlyq-zombylyqty aldyn alý máseleleri talqylandy

ALMATY. QazAqparat - Almatyda qala ákiminiń orynbasary Erjan Babaqumarovtyń tóraǵalyǵymen Áıelder isteri jáne otbasylyq-demografııalyq saıasat jónindegi qalalyq komıssııanyń otyrysy ótti, dep habarlaıdy QazAqparat tilshisi.

Jıyn barysynda áıelderge qatysty turmystyq zorlyq-zombylyqtyń aldyn alý, ana men balany qorǵaý, sondaı-aq ózekti máselelerdi sheshýde tıimdi tásilderdi ázirleý máseleleri qaraldy.

Komıssııa tóraǵasy orynbasarynyń m.a. Sana Jandaı atqarylǵan jumys týraly esep berdi. Áıelderge qatysty turmystyq zorlyq-zombylyqtyń aldyn alý týraly qalalyq polıtsııa departamentiniń ókili Gúlbaný Sabralıeva baıandady. Ana men balany qorǵaýdyń ózekti máseleleri, olardy sheshý joldary boıynsha Almaty qalasy Qoǵamdyq densaýlyq basqarmasy basshysynyń orynbasary Laýra Myrzaǵalı aıtyp berdi.

Otyrystyń qorytyndysy boıynsha Erjan Babaqumarov áıelderge qatysty zorlyq-zombylyq faktilerine jol bermeý boıynsha jumysty kúsheıtýdi tapsyrdy. Sondaı-aq, otbasy ınstıtýtyn nyǵaıtý, qıyn jasóspirimderdi beıimdeý jáne áleýmettendirý, áıelder men balalardyń múddelerin qorǵaý boıynsha memlekettik organdardyń jumysyn úılestirý boıynsha pármendi sharalar ázirleý qajettigin atap ótti.

Sonymen qatar, qala ákiminiń orynbasary turmystyq zorlyq-zombylyqtyń aldyn alý boıynsha servıstik polıtsııa jobasynyń elementterin zerdeleýdi jáne praktıkada qoldanýdy tapsyrdy. Ómirlik qıyn jaǵdaıǵa tap bolǵan áıelderdi qoldaý jónindegi daǵdarys ortalyqtary jelisin keńeıtý qajettigin aıtty.

Talqylaý barysynda sheshýdi talap etetin ózekti máselelerdi anyqtaý úshin aqparattyq-túsindirý jumystaryn kúsheıtý jáne áleýmettik saýalnamalar júrgizý boıynsha usynystar engizildi.