Almatyda Áıelderdiń halyqaralyq kúnine arnalǵan saltanatty jınalys ótti
ALMATY. 5 naýryz. QazAqparat /Názıra Eleýhan/ - Búgin Almatyda Abaı atyndaǵy memlekettik akademııalyq opera jáne balet teatrynda 8 naýryz Halyqaralyq áıelder kúni merekesine arnalǵan «Áıelderge mahabbatpen...» atty saltanatty jıyn ótti.
Merekelik sharaǵa Almaty qalasynyń ákimi Ahmetjan Esimov qatysyp, Almaty áıelderin kele jatqan merekemen quttyqtady.
«Memlekettik saıasatymyzdyń barlyq qurylymdarynda áıelder qyzmet jasaıdy. Qazaqstannyń búgingi tolaǵaı tabystarynyń barlyǵynda Sizderdiń aıqyn qoltańbalaryńyz bar. El jetistikterinde sizderdiń qosqan úlesterińiz ushan-teńiz. Memlekettik qyzmet pen qoǵamdyq iste de, kásipkerlik pen tárbıelilikte de tamasha tabystarǵa qol jetkizip kelesizder. Qalamyzdyń ekonomıkalyq jetistigi de sizderdiń arqalaryńyzda dep aıtýǵa ábden bolady. Oǵan dálel retinde, qazirgi qaladaǵy áeıelderdiń úles salmaǵy erlerden artyq ekenin aıtsaq ta jetkilikti. Al, olardyń basym kópshiligi bilim, mádenıet, densaýlyq saqtaý, áleýmettik salalarda qyzmet isteıtinin eskersek, olardyń mańyzdylyǵy qanshalyqty zor ekendigin kóremiz. Olaı bolsa, Sizderge alǵystan basqa aıtarymyz, baqyttan basqa tilerimiz joq. Ómirlerińiz uzaq, kóńilderińiz kóterińki kóńil men shattyqqa toly bolsyn!»,-dedi qala basshysy Ahmetjan Esimov.
Saltanatty sharaǵa Almatynyń dańqty áıelderi, muǵalimder, dárigerler, ınjenerler, mádenıet, ǵylym jáne sport qaıratkerleri, shaǵyn, orta jáne iri bıznes ókilderi, kóp balaly analar arnaıy shaqyryldy. Merekelik jıynǵa qatysqan barlyq áıel qaýymyna syılyqtar men gúl shoqtary tabys etildi.
Shara Qazaqstan óner sheberleriniń merekelik kontsertimen jalǵasty.
