Almatyda áıelderdi tonaýmen aınalysqan er adam ustaldy
ALMATY. QazAqparat - Almaty polıtsııasy áıelderdi tonaýmen aınalysqan er adamdy ustady, dep habarlaıdy QazAqparat tilshisi.
Qalalyq polıtsııa departamentiniń baspasóz qyzmeti habarlaǵandaı, 30 jastaǵy er adam túngi 22:00 men 01:00 arasynda áıel adamdardyń qolyndaǵy sómkeleri men telefondaryn tartyp alyp, qashyp ketip otyrǵan.
Bir ǵana Bostandyq aýdanynda onyń 3 epızodqa qatysy bary anyqtaldy.
«Ádette áıelder eńgezerdeı er adamdy qýyp jete almaı qalady, ári qýyp jetse de eshqandaı shara qoldana almaıdy. Mundaı sátte qurban bolǵan adamdarǵa qylmyskerdiń túr-álpetin tanyp alǵan jón. Polıtsııaǵa bul aqparat kóp maǵlumat beredi», - dedi Bostandyq aýdany polıtsııa basqarmasynyń bólim bastyǵy Erkin Amantaev.
Polıtsııanyń habarlaýynsha, kúdikti munyń aldynda da urlyqpen ustalyp, isti bolǵan.
«Sýrettegi adamnan japa shekken adam bolsa, 298-52-84; 298-52-81 nemese 102 telefondaryna habarlasýyn suraımyz», - deıdi polkovnık Erkin Amantaev.
