Almatyda áıelder arasynda júgirýden jarys ótti
ALMATY. QazAqparat – Búgin «Atakent» Qazaqstan iskerlik yntymaqtastyq ortalyǵy parkinde áıelder arasynda jyl saıynǵy júgirýden jarys ótti. Jarysqa 450 adam qatysty, dep habarlaıdy QazAqparat.
Jarysqa 10-14 jas aralyǵyndaǵy jas sportshylar alǵash ret qatysty. 3 shaqyrymdy 11 mınýt 24 sekýndta eńsergen Rıma Grankına jeńimpaz atandy.
Negizgi qashyqtyqtyń qatysýshylary 7 shaqyrym júgirdi. Olardyń arasynda máre syzyǵyna birinshi bolyp kelgender mynalar:
1-oryn – Tatıana Neroznak (0:26:31),
2-oryn – Dana Gýsarova (0:27:58),
3-oryn – Ekaterına Shatnaıa (0:30:24).
Jas sanaty boıynsha da sportshylardy marapattaý rásimi ótti. Atap aıtqanda, Polına Repına - 15-29 jastaǵy qatysýshylar arasynda, Svetlana Alehına - 30-39 jas, Almıra Qusaıynova - 40-49 jas, Zanfıra Chernýhına – 50 jastan asqandar arasynda birinshi oryn ıelendi.
Óz qashyqtyǵyn túgel júgirip ótken qyzdardyń barlyǵy máre syzyǵyna jetken soń medaldarmen marapattaldy.
«Men 2017 jyldan beri júgiremin. Qazir Almaty jartylaı marafonyna daıyndalyp jatyrmyn. Alǵash ret 21 shaqyrym qashyqtyqqa júgirem. Áıelder jarysyna ekinshi ret qatysyp otyrmyn. Meniń maqsatym - jeńimpaz ataný nemese jeke rekord ornatý emes. Maǵan áıelder arasyndaǵy júgirý jarysy atmosferasymen unaıdy. Іs-sharanyń ózi jańa jetistikterdi baǵyndyrýǵa yntalandyrady», - dedi búgingi jarystyń qatysýshysy Kamılla Seısebaeva.
Áıelder jarysynda eń ádemi kıingen arýlar da atap ótildi.
Balalar arasyndaǵy jarysta negizgi tús sary bolsa, 7 shaqyrymdyq qashyqtyqqa júgirgender aq kıim kıip shyqty. Qyzǵylt kıim kıgen qyzdar skandınavııalyq júris boıynsha da synǵa tústi. Bul sport túrimen aınalysatyndar sany jyldan jylǵa artyp keledi.
«Skandınavııalyq júrispen shuǵyldanyp júrgenime bir jyldan asty, - deıdi «Almaty marafonynyń» qatysýshysy Oksana Kım. - Bul sportqa kóńil aýdarýyma kúıeýim yqpal etti. Ol eki jyldan beri marafondarǵa qatysyp júr. Oǵan jankúıer retinde kelip, jarystyń atmosferasyn kórgennen keıin ózimniń qatysqym keldi. Birden jarys jolyna shyǵý qıyn boldy. Sondyqtan skandınavııalyq júris - men úshin ońtaıly jol. Qyzymyz «Almaty marafonynyń» balalar arasyndaǵy synyna qatysyp jatyr. Bul bizdiń otbasylyq hobbıge aınaldy».
Barlyq nátıjelerdi myna siltemeden kórýge bolady
Endigi úlken shara - Almaty jartylaı marafony 13 qazanda ótedi. Jarysqa 5000-ǵa jýyq adam qatysady dep josparlanǵan.
