Almatyda áıelder arasynda sporttyq pokerdan týrnır ótedi
ALMATY. Qańtardyń 16-sy. QazAqparat /Erbol Azanbek/ - Sporttyq poker áýesqoılarynyń respýblıkalyq federatsııasynyń uıymdastyrýymen qańtardyń 21-i kúni Almatydaǵy «Qazaqstan» poker-klýbynda sporttyq pokerdan áıelder arasynda tuńǵysh ret el chempıonaty ótedi,
dep habarlaıdy QazAqparat.
Uıymdastyrýshylardyń aıtýynsha, týrnırdiń maqsaty - áıelder qaýymyn sporttyq poker oıynyna tartý, oıyndy tanymal etýge yqpal jasaý. Sondaı-aq uıymdastyrýshylar týrnır qorytyndysy boıynsha Ladies Championship-taǵy WSOP álemdik saıysyna qatysýy úshin elimizdiń áıelder quramasyn jasaqtaýdy kózdeıtinin aıtady.
Túrli zertteýler boıynsha álemde poker oınaýshylardyń úshten birin áıelder quraıdy. Búginde poker oınaýshylardyń ishinde Lıka Gerasımova, Katıa Tater, Kellı Hý, Klonı Goýen, Annet Obrestad syndy álemge tanymal sportshylar bar.
