Almatyda áıel zorlanǵan túrmeniń basshysyna qatysty is jeke óndiriske shyǵaryldy
ALMATY. QazAqparat - Almatyda sottalýshy áıel zorlanǵan túrme mekemesiniń bastyǵynyń mindetin atqarýshyǵa qatysty sotqa deıingi tergeý júrgizilýi múmkin. Qazir oǵan qatysty is bólek óndiriske berildi. Bul týraly búgin «QazAqparat» tilshisine bergen jaýabynda Natalıa Slekıshınanyń advokaty Aıman Omarova habarlady.
«Kesh is aıaqtaldy. Ol prokýratýra arqyly sotqa berildi. Keshe keshke qaraı is prokýratýraǵa kelip jetti. Ony qaraýǵa prokýrorǵa 10 táýlik beriledi. Sondaı-aq, men prokýratýraǵa aryz berdim, al ótinish hatty is aıaqtalǵan soń tergeýshige berdim», - dedi Aıman Omarova.
Onyń aıtýynsha, is boıynsha basty kúdikti - Rýslan Hákimov.
Oǵan qatysty Almaty qalasynyń №2-shi Medeý aýdandyq soty QR Qylmystyq Kodeksiniń 362-shi baby 4-shi tarmaǵynyń 1-shi bóligi (qyzmet babyn asyra paıdalaný) jáne 120-shy baby 2-shi tarmaǵynyń (zorlaý) 4-shi bóliginde (áldeneshe ret) qarastyrylǵan quqyq buzýshylyqtardy jasaǵan degen kúdikpen eki aıǵa qamaýǵa alý jóninde bultartpaý sharasyn sanktsııalady.
Al, sol kezde túrme mekemesiniń bastyǵy qyzmet atqarǵan Ermek Ormarbekovqa qatysty is óz aldyna bólek óndiriske berildi.
«Ermek Omarbekovqa qatysty endi sotqa deıinge tergeý sharalary júrgizilýi múmkin», - dedi advokat.
Esterińizge sala ketelik, sottalýshy Natalıa Slekıshına bıyl shilde aıynyń basynda qamaýda toptyq zorlaýdyń qurbany bolǵandyǵyn, sonyń saldarynan qyz bosanǵandyǵyn habarlaǵan bolatyn. Onyń aıtýynsha, túrme basshylyǵy alǵashynda zorlaý týraly isti jasyrmaq bolǵan. Alaıda, saraptama qylmystyq iske qatysty tulǵalardyń biriniń ákeligin rastady.
Zorlaý oqıǵasy QR ІІM Qylmystyq atqarý júıesi komıtetiniń LA-155/18 memlekettik mekemesiniń tergeý abaqtysynda bolǵan. Natalıa Slekıshınanyń aıtýynsha, zorlaýǵa osy mekemeniń tórt qyzmetkeri qatysqan.
