Almatyda «Áıel jáne din» forýmy ótedi
ALMATY. 27 aqpan. QazAqparat - Almatyda 4 naýryz kúni Qazaq memlekettik qyzdar pedagogıkalyq ýnıversıtetinde «Áıel jáne din» dep atalatyn forým ótedi.
Onda «Qazaq tarıhyndaǵy áıelder kelbeti. Qazirgi zaman áıelderi», «Dindegi áıel mártebesi. Dindar áıel. Dinı tárbıe», «Qoǵamnyń damýy men onyń rýhanı jańǵyrýyndaǵy áıelderdiń róli» taqyryptary týraly oı-pikirler ortaǵa salynady.
«Qyzdar ýnıversıteti» medıa ortalyǵynyń jetekshisi Dármen Smaıyldyń aıtýynsha, forým jumysyna QR Prezıdenti janyndaǵy Áıelder isteri jáne otbasylyq-genderlik saıasat jónindegi komıssııa tóraıymy Gúlshara Ábdihalyqova, QR Bilim jáne ǵylym mınıstri Baqytjan Jumaǵulov, QR Din isteri agenttiginiń tóraǵasy Qaırat Lama Shárip jáne ózge de úkimet músheleri, qoǵam qaıratkerleri, aqyn-jazýshylar, qaırymdylyq qorlary men qoǵamdyq birlestik jetekshileri shaqyrylyp otyr. Shara barysynda respýblıkalyq deńgeıde qazaq qyzynyń zamanaýı bolmys-bitimi men kelbetin somdap shyǵarýmen aınalysatyn «Qyz Jibek» qyzdar klýbynyń ashylý saltanaty bolady. Ol «Áıel - ult pen álem bolashaǵynyń kepili» nemese «Ultyńdy tárbıeleımin deseń, qyzyńdy tárbıele» degen danalyqtardy basty maqsaty retinde ustanbaq.
QR Statıstıka agenttiginiń málimeti boıynsha ótken jyly el halqynyń jalpy sany 16 mıllıon 719 myń 100 adamdy quraǵan. Onyń 8 mln. 654 myń 200-i áıelder bolyp otyr. Genderlik teńdik boıynsha álemdegi 135 eldiń ishinde 31-shi orynda turǵan Qazaqstanda memlekettik qyzmettegi áıelderdiń úles salmaǵy - 60 paıyzdy quraıdy.
