Almatyda áıel turǵyndardy memlekettik baǵdarlama boıynsha úı alyp beremin dep aldaǵan
ALMATY. QazAqparat – Almatyda turmysy tómen otbasylarǵa memlekettik baǵdarlama boıynsha úı alyp beremin dep aldaǵan alaıaq áıel ustaldy, dep habarlaıdy QazAqparat tilshisi.
Almaty qalalyq Polıtsııa departamentinen málim etkendeı, ustalǵan M. esimdi áıel alaıaqtyq áreketi úshin buryn sottalǵan bolyp shyqty. Bul joly 60 jastaǵy áıel ózin saıası partııa múshesi retinde tanystyryp, adamdardyń senimine kirip, olardan iri kólemde aqsha alǵan.
«Alaıaqtyń arbaýyna túskenderdiń kóbi óziniń tanystary. Aralarynda baspanaǵa muqtaj emes, tipti baqýaty turatyndary da bar. Olardyń tanystarynyń sózine sengeni sonshalyq, keıbireýi tipti bankten nesıe de alǵan. Qarjyny turǵyndar aldyn ala páter kezegine turý úshin bergen. Adamdardan alynǵan qarjy kólemi 300 myń men 1,5 teńgeniń aralyǵynda. Alaıda, ákki kelinshektiń bireýge kómektesý degen nıeti bolmaǵan. Oǵan aldanǵandardyń eshqaısysy baspanaly bolmady. Al alaıaqtyq jolmen qolyna túsken qarajatty áıel jeke paıdasyna jumsaǵan»,– deıdi Almaty qalasy Bostandyq aýdandyq polıtsııa basqarmasy janyndaǵy polıtsııa bóliminiń bastyǵy Ǵalym Qasymbaev.
Qazirgi tańda, kúdiktiniń osyndaı segiz alaıaqtyq qylmysqa qatysty bar ekeni anyqtaldy. QR QK-niń 190-baby 3-tarmaǵy 4-bólimi boıynsha qylmystyq is qozǵaldy. Tergeý amaldary jalǵasýda.
