Almatyda áıel adamdy qaǵyp ketken kólik júrgizýshisine izdeý jarııalandy
ALMATY. QazAqparat - Almaty polıtseıleri 44 jastaǵy áıeldi qaǵyp óltirip ketken kólik júrgizýshisine izdeý jarııalady, dep habarlaıdy QazAqparat tilshisi ІІD baspasóz qyzmetine silteme jasaı otyryp.
Qalalyq ІІD aqparatyna súıensek, jol-kólik oqıǵasy 14 naýryz kúni Áýezov aýdanynda túngi saǵat 23-00-der shamasynda bolǵan. Aty-jóni anyqtalmaǵan júrgizýshi áıel adamdy qaǵyp ketken. Japa shegýshi oqıǵa ornynda mert bolǵan.
ІІD Jergilikti polıtsııanyń izdeý jóliminiń basshysy Erik Nasyrbekovtyń aıtýynsha, adamdy qaqqan kólik júrgizýshisi asa qatty jyldamdyqpen kele jatqan.
Erik Nasyrbekov tájirıbe boıynsha mundaı qaıǵyly jaǵdaımen aıaqtalyp jatatyn apatta oqıǵa ornynan negizinen mas júrgizýshiler nemese jańadan kólik róline otyrǵandar iz sýytatynyn aıtty.
«Áıel adamnyń óliminiń naqty sebebin anyqtaý úshin óndiristegi is aıasynda sot-medıtsınalyq saraptama jasalady. Adam ólimine soqtyrǵan jol-kólik apaty QR QK 345-baby, 3-bóligi boıynsha sotqa deıingi tergep-tekserý birińǵaı tizilimine tirkeldi. Qazirgi ýaqytta oqıǵanyń sebebi anyqtalyp jatyr», - dedi Nasyrbekov.
Almaty polıtseleri atalǵan oqıǵa boıynsha kýágerler bolsa, 254-45-05, 254-47-80, 8701 888 48 82, 8707 837 78 13, 8777 280 15 55 nemese «102» telefon nómirlerine habarlasýdy suraıdy.
