Almatyda áıel adam júrgizýshi kýáligin basqa tekpen alǵan

ALMATY. QazAqparat - Almaty qalasynda 15-24 tamyz aralyǵynda qalalyq ІІD jol-patrýldik polıtsııa bólimi men qalalyq ádilet departamentiniń qyzmetkerleri birlese otyryp, salynǵan aıyppuldardy der kezinde tóleýdi arttyrý maqsatynda birlesken shara ótkizýde. Oǵan «Potok-M» mobıldi kesheni, jol-patrýldik polıtsııa ekıpajdary jáne jergilikti polıtsııa qyzmetiniń ekologııalyq beketteri jumyldyrylǵan. Bul týraly búgin Almaty qalalyq ІІD baspasóz qyzmetinen habarlady.

Shara barysynda Almaty polıtsııasy aıyppul tólemeýshilerdi anyqtaý barysynda avtokólik júrgizý quqyǵynan aırylǵan áıeldi ustady. Ol basqa tekpen  júrgizýshi kýáligin qaıta jasatyp alǵan eken.

«Ál-Farabı dańǵyly men Jarokov kóshesiniń qıylysynda polıtsııa ekıpajy «Leksýs» markaly avtomashınasyn toqtatqan bolatyn. Rólde 35 jastaǵy áıel otyrdy. Tekserý barysynda ol 2015 jyly azamatsha K.-nyń atyna alynǵan júrgizýshi kýáligin kórsetti. 

Derekter bazasyna qarasaq, buryn bul áıeldiń basqa tegi bolǵandyǵy, júrgizýshi kýáligin 2003 jyly alǵandyǵy anyqtaldy. Alaıda, bul júrgizýshi 2015 jyly qarashada jol-kólik apatyna sebepker bolyp, oqıǵa ornynan iz jasyrǵan. Osyǵan baılanysty oǵan qatysty QR Ákimshilik quqyqbuzýshylyq kodeksiniń 611-babynyń 2-shi tarmaǵy boıynsha ákimshilik is qozǵalǵan. Sóıtip, mamandandyrylǵan aýdanaralyq ákimshilik sottyń úkimimen bul áıel 2015 jyldyń 22 jeltoqsanynan bastap 12 aıǵa júrgizýshi kýáliginen aırylǵan. Biraq, kórinip turǵanyndaı, pysyqaı avtoáýesqoı zańdy aınalyp ótip, tegin K.-ǵa ózgertip, jańa kýálik alyp alǵan. Taǵy bir qyzyǵy, bıyl maýsym aıynda azamatsha K. tegin taǵy da B.-ǵa ózgertip, aty-jónin rastaıtyn jańa kýálik alypty. Osylaısha, bul áıel quqyq qorǵaý organdaryn qasaqana adastyryp, jaýapkershilikten qutylyp ketpekshi bolǵan. Osyndaı quqyqbuzýshylyq áreketter jasaǵany úshin júrgizýshi QR Ákimshilik quqyq buzýshylyq týraly kodeksiniń 612-babynyń 3-shi tarmaǵy boıynsha ákimshilik jaýapkershilikke tartylyp, onyń avtokóligi arnaıy aıyp turaǵyna qoıyldy. Al, K.-nyń atyndaǵy júrgizýshi kýáligi QR Ákimshilik quqyq buzýshylyq týraly kodeksiniń 795-babyna sáıkes tárkilendi», - dedi Almaty qalalyq ІІD Ákimshilik polıtsııa basqarmasynyń bastyǵy, polıtsııa polkovnıgi Nurlan Almasbekov.  

Qazirgi tańda Almaty polıtsııasynyń jeke quramy qasaqana aıyppul tólemeýshilerge qatysty yqpal etý sharasyn qoldanyp jatyr.

«Ákimshilik aıyppul salý týraly qaýlyny májbúrli túrde oryndatý maqsatynda sot oryndaýshylaryna jalpy somasy 200 mln.-nan astam teńgege 18 myńnan astam materıal jiberildi. Olardyń ishinde qazaqstandyqtarmen qatar, sheteldik azamattarǵa qatysty qozǵalǵan materıaldar da bar», - dedi polkovnık Almasbekov.