Almatyda áıel adam órtten eki sábıdi aman alyp qaldy
ASTANA. QazAqparat - Almatyda áıel adam órt kezinde eki sábıdi aman alyp qaldy, dep habarlaıdy QazAqparat Almaty qalalyq Tótenshe jaǵdaılar departamentiniń baspasóz qyzmetine silteme jasap.
6 qyrkúıek kúni Almatydaǵy «Aqsaı-4» shaǵyn aýdanynda 9 qabatty úıdiń úshinshi qabatyndaǵy páterlerdiń birinen órt shyqty.
Órt sóndirýshiler kelgenshe kórshi áıel bir jarym jasar jáne 7 jastaǵy sábılerdi ólimnen alyp qaldy. Abyroı bolǵanda, balalar otyrǵan páterdiń esigi jabyq bolǵanymen qulyptalmaǵan bolyp shyqty. Podezden kúıiktiń ısin sezgen Beıbitkúl Ydyrysova betin úıge kıetin halatymen búrkemelegen kúıinde, tútin basqan páter ishine kirip ketken.
Qoıý tútin kózdi ashyta bastaǵanyna qaramastan ol ómirin qaterge tige otyryp, balalardy alyp shyqqan. Onyń ústine ol bul páterdiń turǵyndaryn jaqsy biletin bolyp shyqty, ıaǵnı úıde balalardyń bolýy múmkindigin de boljaǵan. Qara tútinshiń ishinde Beıbitkúldiń aıqaıyna 7 jastaǵa bala jaýap bergen.
Balalardy taýyp alǵan soń olardy dalaǵa alyp shyqqan. Artynan órt sóndirýshilerge habar bergen. Keıin málim bolǵanyndaı, balalardyń anasy olardy az ýaqytqa tastap mektepke ketken. Abyroı bolǵanda, órtten eshkim zardap shekpedi. Alaıda kórshi áıeldiń jankeshtiligi bolmaǵanda, jaǵdaıdyń qalaısha órbýi múmkindigin oılaýdyń ózi qorqynyshty.
Almaty qalalyq TJ departamenti turǵyndardyń balalaryna muqııat bolyp, olardy múmkindiginshe jalǵyz qaldyrmaýǵa tyrysý qajettigin eskertedi.
