Almatyda áıel adam basqarǵan páter tonaýshylar ustaldy
Atalǵan toptyń jetekshisi 45 jastaǵy áıel adam boldy. Onyń kómekshileri buryn sottalǵan eki er adam boldy.
«Qazirgi ýaqytta qylmystyq úshtikte qala aýmaǵynda jasalǵan bes urlyq epızody bar. Kúdiktilerdi áshkereleýge arnalǵan arnaıy is-shara ótken kúni júrgizildi. Kezekti urlyqtaryn jasaǵan soń, olar birden ustaldy. Urylar mingen Nexia kóligi jeke sektorda buǵattaldy. Ustalǵandardan zattaı aıǵaqtar: gıtara, narda, birneshe telefon jáne baǵaly zattar tabyldy. Sonymen qatar, jasandy shash, ámııan jáne kiltter anyqtaldy», – dedi Almaty qalalyq polıtsııa departamenti bastyǵynyń orynbasary Berik Ábilbekov.
Onyń aıtýynsha, «qylmystyq úshtiktiń» sońǵy qylmysy Ójet yqsham aýdanynda jasalǵan. Olar bóten úıge terezeden kirgen.
«Olar standartty túrde áreket etti. Turǵyn úıge kirer aldynda úı ıeleriniń bar-joǵyn tekserdi, sodan keıin ǵana qulypty ashty. Olar barlyq qundy zattardy: aqshany, shaǵyn qural-jabdyqtardy, túrli zergerlik buıymdardy alyp shyqty. Ekeýi bireýdiń úıinde urlyq jasap jatqanda, úshinshisi kólikte kútken. Bylaısha aıtqanda qaýipsizdikti baqylap turǵan. Aıtpaqshy, kúdiktiler 45 jastaǵy H. esimdi azamatsha jáne 44 jastaǵy K. esimdi azamat, buryn osyǵan uqsas qylmystardy jasaǵany úshin sotty bolǵan, al úshinshi qatysýshy 35 jastaǵy azamat, birinshi ret «qylmystyq jolǵa» túsken. Qazirgi ýaqytta páter urlyǵyna qatysýshylar ýaqytsha ustaý ızolıatoryna qamaldy. Sotqa deıingi tergeý amaldary júrgizilip, olardyń basqa da qylmystyq epızodtarǵa qatysy bar-joǵy anyqtalýda», – dedi Berik Ábilbekov.