Almatyda avtoturaqtyń ornyna biregeı ámbebap «Sport saıabaǵy» ashyldy (FOTO)

ALMATY. QazAqparat - Búgin Almaty ákimi Baýyrjan Baıbek almatylyq jeke ınvestorlardyń aqshasyna salynǵan jańa sport saıabaǵynyń saltanatty ashylý rásimine qatysty. Turǵyndarǵa arnalyp salynǵan jańa keshen Seıfýllın dańǵyly boıyndaǵy «MEGA Park» saýda oıyn-saýyq ortalyǵynyń aýmaǵynda ornalasqan.

Jobanyń tusaýkeseri dástúrli aptalyq velosherýden keıin bastaldy.  

«Qurmetti almatylyqtar, jastar men sportshylar! Biz búgin velomarafon ótkizý dástúrin jalǵastyryp jatyrmyz. Biraq búgingi kún - erekshe kún! Keshe QR Memlekettik rámizder kúnin atap óttik. Biz óz rámizderimizben maqtanamyz. Sportshylarymyz ár túrli jarystarda jeńiske jetse, elimizdiń Týy kóterilip, memlekettik ánuran oryndalady. Bul elimizdi álemge tanyta túsedi. Taǵy bir úlken jańalyq - búgingi sport saıajaıynyń ashylýy. Bul jerde buryn avtoturaq bolǵan. Al búgin munda úlken sport kesheni boı kóterdi. Men Almaty qalasynyń qashanda kórikti, tartymdy bolǵanyn qalaımyn. Sol úshin qalamyzdy aıalaı bileıik. Ol bizdiń ortaq baspanamyz. Sondyqtan, qalamyzdyń damýyna atsalysyp, bir-birimizge syılastyqpen qaraıyq», - dedi B. Baıbek.   

Shara barysynda ákim 15 000 sharshy metr aýmaqty alyp jatqan kóp atqarymdy alyp saıabaqty aralap kórdi. Onda skeıtodrom, júgirý joly, basketbol, voleıbol jáne tennıske arnalǵan kópatqarymdy sport alańy, jipti alań jáne qysta muz aıdynyna aınaldyrýǵa bolatyn fýtbol alańy bar.  

Jekelegen alańqaılar sporttyń streetworkout ı crossfit túrlerine arnalǵan. Sondaı-aq, keshen aýmaǵynda zamanaýı jabdyqtarmen jabdyqtalǵan eki balalar alańy bar. Bıyl shilde aıynda Sport saıabaǵynda frantsýz átkenshegi jáne órmeleýge arnalǵan bıiktigi 7 metrlik «jartas» ornatylady. 

Saıabaq aýmaǵynda sonymen qatar, mádenı, merekelik sharalar ótkizýge arnalǵan sahna bolady. 

Odan basqa, saıabaqta 3 myń sharshy metr jerge jasyl jelek egilgen. 450-den astam aǵash jáne basqa da tal-shilikter otyrǵyzylǵan.

Osylaısha, Almatyda danııalyq sáýletker ıAn Geıldiń «Almaty kólikterge emes, adamdarǵa arnalǵan qala» tujyrymdamasy júzege asyrylýda.

Sport saıabaǵynyń aýmaǵyndaǵy kóptegen alańqaılar tegin jumys isteıtin bolady. Al attraktsıondardan túsetin qarjy qyzmet kórsetýshi jeke quramnyń jalaqysy men tehnıkalyq qyzmet kórsetý jumystaryna jumsalady. 

Jyl boıyna osy sport saıabaǵynda 5000-daı adam ári dem alyp ári sportpen aınalysa alady. 

Aıta ketelik, saıabaqty jabdyqtaýǵa qoldanylǵan materıaldyń basym bóligi Qazaqstanda óndirilgen.

Sport saıabaǵy ashylǵan soń qala ákimi almatylyqtar atynan bokstan eki dúrkin álem chempıony atanǵan Nazym Qyzaıbaıdy jeńisimen quttyqtady.