Almatyda avtoturaq «qyzmetkerleri» jaýapqa tartylýda
ALMATY. QazAqparat - Almatyda kólikterdiń turaqqa turýyna kómektesip, zańsyz aqsha taýyp júrgen 247 adam jazaǵa tartyldy, dep habarlaıdy QazAqparat tilshisi.
Almaty bıligi júrgizýshilerge mashınasyn turaqqa qoıýǵa kómekteskeni úshin aqy talap etetindermen kúresti kúsheıtti.
Mamandardyń aıtýynsha, jasyl jılet kıgender kóbinese saýda úıleriniń mańynda nápaqasyn taýyp júr.
«Qalada avtomattandyrylǵan turaq júıesi bar. Alaıda keı aýdandarda júrgizýshilerden turaq úshin aqsha alatyn adamdar bar. Bul adamdardyń áreketi QR ÁqbK 449-babymen retteledi. Jyl basynan beri 247 adam ákimshilik jaýapkershilikke tartyldy», - dedi Almaty qalalyq Polıtsııa departamenti jergilikti polıtsııa qyzmeti basqarmasynyń basshysy Tórehan Isın.
Polıtsııa sonymen qatar, avtobýstardyń ıntervalyn baqylaıtyn «dıspetcherlerdi» de ustady. Olardyń áreketinen avtobýs qozǵalysynyń kestesi jıi buzylatyn kórinedi. Mundaı qyzmetkerlerdiń jumysy zańǵa qaıshy, sebebi qalalyq mobıldilik basqarmasynda mundaı laýazymǵa shtat bólinbegen. Ustalǵandarmen túsindirý jumystary júrgizildi.
«Bul quqyqbuzýshylyqtar qaıtalanǵan jaǵdaıda budan qatalyraq jazaǵa tartylatyny aıtyldy. Ákimshilik qamaýǵa alýǵa deıin jazalanýy múmkin. Júrgizýshiler turaq aqysy tek parkomattarǵa tólenýi tıistigin bilýi jáne este saqtaýy tıis», - dedi podpolkovnık Isın.
