Almatyda avtoturaq aqysy kóteriledi
ALMATY. QazAqparat - Osy jyldyń qyrkúıek aıynda Almatyda avtoturaq baǵasyn kóterý josparda. Bul týraly máslıhattyń kezekten tys sessııasynda qala ákimi Erbolat Dosaev málim etti, dep habarlaıdy QazAqparat tilshisi.
«Bıyl avtoturaq oryndaryn anyqtaımyz, aýmaqqa baılanysty turaq aqysyn kóteremiz. Bul jumystardy 1 shildege deıin istep úlgermeımiz, biraq qyrkúıektiń basynda daıyn bolýy kerek», - dedi Erbolat Dosaev.
Aıtýynsha, kólik turaǵy úshin tólem ornalasqan aýdanyna baılanysty ár túrli bolmaq.
«Máselen, Alataý, Medeý aýdanynda, Qulja tasjolyna shyǵa beriste bir tarıf bolady delik, al tarıhı ortalyqqa jaqyn jerde tarıfter kóteriledi. Qarajat bıýdjet kirisine jumsalady. Avtoturaq, aıyppul men ósimpuldan túsken aqshanyń bári proportsıonaldy túrde aýdandardaǵy «Halyq qatysatyn bıýdjet» jobasyna qosymsha aýdarylady», - dep túsindirdi qala ákimi.
