Almatyda avtoshoý ótedi
ALMATY. Qazannyń 28-i. QazAqparat /Erbol Turymbetov/ - «Dakar - 2011» rallı-marafonyna qatysatyn «Astana» birinshi qazaqstandyq komandasy Almatyǵa keldi.
Aıtýly dodaǵa qatysatyn KamAZ kóligin ońtústik astanaǵa komandasynyń jetekshisi Artýr Ardavıchýs jetkizdi. Oǵan dosy jáne áriptesi, reseılik «KamAZ-master» komandasynyń júrgizýshisi Andreı Kargınov jolserik boldy. Olardyń ekıpajy qyrkúıek aıyndaǵy «Silk Way Rally 2010» jarysyna qatysyp, onda 6-shy orynǵa turaqtaǵan. Kargınov sonymen birge astanalyqtarmen «Dakar - 2011» saıysyna da qatysqaly otyr.
Jalpy komanda tarıhy 12 jyldy qamtıdy. Buǵan deıin birneshe jarystarda júldeli oryndarǵa ıe bolǵan top endi basty jarys - «Dakarǵa» qatysqaly otyr. Komanda quramyna dırektor Marat Abyqaev, júrgizýshi Artýr Ardavıchýs, shtýrman Denıs Berezovskıı jáne mehanık Janat Jálimbetovter kirgen.
Endi top músheleri óz ónerlerin qazannyń 30-y kúni «Astana» alańynda kórsetedi. Onda basty keıipkerlerden basqa qazaqstandyq tanymal shabandozdar, drıfterler men kaskaderler de qatysady. Sonymen birge, sharaǵa qoldaý kórsetip otyrǵan Almaty qalasy ákimdigi men Avtomotosport qaýymdastyǵy ókilderi de bolady. Avtoshoý tegin ótkiziledi. Shoý aıaqtala salysymen, astanalyqtardyń KamAZ-y «DAKAR - 2011-ge» qaraı jolǵa shyǵady. Bul jolǵy jarys Argentına-Chılı baǵytynda ótkizilgeli otyr.
