Almatyda «Avtorlyq jáne sabaqtas quqyq» týraly QR Zańynyń erejesin túsindirý jaıynda jıyn ótti

dep habarlaıdy QazAqparat.

«Demeý» prodıýserler men oryndaýshylar odaǵy» respýblıkalyq qoǵamdyq birlestiginiń tóraǵasy, tanymal prodıýser jáne ánshi Qydyráli Bolmanovtyń aıtýynsha, atalmysh Zań erejesine sáıkes tutynýshy kommertsııalyq maqsatta fonogramma qoldanǵan kezde aqsha tóleýge mindetti, al quqyq ıelenýshi sol syıaqyny alýǵa quqyly. «Demeý» prodıýserler men oryndaýshylar odaǵy» RQB-nyń negizgi maqsaty oryndaýshylardyń ujymdyq negizde múliktik quqyqtardy basqarý, shektes quqyqtardyń tıimdi qorǵaý júıesiniń qurylymy jáne shektes quqyqtarǵa syıaqy bólý bolyp tabylady», deıdi Q.Bolmanov.

2005 jyly oryndaýshylardyń quqyǵyn qorǵaý baǵytynda qurylǵan «Demeý» prodıýserler men oryndaýshylar odaǵy» respýblıkalyq qoǵamdyq birlestigi aǵymdaǵy jyldyń 16-shy sáýirinde QR Ádilet mınıstrliginen akkredıtatsııa kýáligin alǵan. «Akkredıtatsııany alý qazaqstandyq ánshilerdiń syıaqy jınaǵyn kóbeıtýge jáne jumystyń joǵary deńgeıde júrgizilýine múmkindik beredi», dep atap ótti óz sózinde birlestik tóraǵasy.

Sonymen qatar ol qazaqstandyq oryndaýshylardyń múddesin qorǵaý úshin Reseılik birlestikpen yntymaqtastyq shart jasap, Eýropa, AQSh, Qytaı jáne TMD memleketterindegi oryndaýshylardyń múddesin qorǵaıtyn uıymdarmen sharttar jasap jatqandyǵyn jetkizdi.

«Demeý» prodıýserler men oryndaýshylar odaǵy» RQB-ǵa elimizdiń tanymal ánshileriniń 200-den astamy ózderiniń quqyqtaryn basqarýǵa senim bildirgen.

Qazirgi ýaqytta Qaraǵandy, Shyǵys Qazaqstan, Almaty oblystary men Astana qalasy, Petropavl jáne Kókshetaýda «Demeý» prodıýserler men oryndaýshylar odaǵy» RQB-nyń fılıaldary jumys jasap jatyr.

Sondaı-aq jıyn barysynda ánshiler beıne klıpterin teledıdar arqyly taratýǵa óte kóp qarjy suraıtyndyqtaryn aıtyp, qazaq beıne klıpterin tek túngi ýaqytta ǵana kórsetetindigine narazy ekendikterin jetkizdi.

Sharaǵa áýen oınatylatyn teleradıokompanııalar, meıramhana, qonaqúı, fıtnes-klýb, saýda-sattyq ortalyqtary men elimizdiń ánshileri qatysty.