Almatyda avtopark «Ońaı» júıesi operatorymen sottasyp, 20 mln teńge óndirmek boldy
ALMATY. QazAqparat - Almaty qalasynyń mamandandyrylǵan aýdanaralyq ekonomıkalyq sotynda «Green bus company» tasymaldaýshysynyń «Ońaı» tólem júıesiniń operatory «Almaty kólik holdıngi» AQ-dan 20 056 500 teńge aıyppul óndirý boıynsha aryzy qaraldy, dep habarlaıdy QazAqparat tilshisi.
Іs materıaldaryna sáıkes, «Green bus company» men operator arasynda kelisimshart jasalǵan. Transport holdıngi qoǵamdyq kólikte jol aqysyn esepteýdiń avtomattandyrylǵan keshendi júıesin (JAEAKJ) júrgizýdi qamtamasyz etýi kerek bolatyn.
Byltyrǵy qazannan bıylǵy mamyrǵa deıin «Green bus company» Kólik holdıngine esepteý júıesiniń JAEAK tehnıkalyq aqaýyn jóndeýge ótinish bildirgen.
Kelisimshart boıynsha operator bir táýlik ishinde qurylǵyny jóndeýi kerek.
Jyljymaly quramnyń tehnıkalyq aqaýy kesirinen júrmeı turyp qalǵan jaǵdaıda operator tasymaldaýshyǵa kúnine 1 AEK kóleminde aıyppul tóleýi tıis.
«Green bus company» ókilderi sotta kelisimsharttyń buzylǵany týraly birqatar hatty dálel retinde keltirdi.
«Keltirilgen derekterdi zertteı kele sot atalǵan hattarda qurylǵyny ornatý týraly ǵana aıtylǵanyn, buzylǵan jaǵdaıdaǵy jóndeý jumystaryna qatysy joqtyǵyn anyqtady», - delingen sottyń qaýlysynda.
Osylaısha sot «Green bus company» tasymaldaýshysynyń «Almaty kólik holdıngi» AQ aıyppul óndirý týraly aryzyn qanaǵattandyrmady.
Alaıda, jeke tasymaldaýshy sot sheshimine apellıatsııalyq shaǵym túsirmek.
