Almatyda avtokóliktiń salyq bereshegin májbúrli óndirip alý aktsııasy júrýde

ALMATY. QazAqparat – Almatyda 17 maýsymnan bastap «Salyq bereshegi joq qala» aktsııasy bastaldy, dep habarlaıdy QazAqparat tilshisi Almaty qalasy boıynsha memlekettik kirister departamentiniń baspasóz qyzmetine silteme jasap.

Vedomstvonyń málimetinshe, aktsııanyń maqsaty avtokólik ıelerinen salyq bereshegin májbúrli túrde óndirip alý.

Aktsııa sheńberinde Almaty qalasy boıynsha memlekettik kirister departamenti qalalyq polıtsııa departamenti jáne jeke sot oryndaýshylarymen birlese reıdtik is-sharalar ótkizedi.

Reıd barysynda bereshegi bar boryshkerlerdiń avtokólikteri «Sergek» beınekameralary arqyly anyqtalyp, bereshek tolyq ótelgenshe aıyppul turaǵyna qoıylady.

Eki saǵat jumys ishinde 11 mln teńge qaryzy bar onnan astam kólik aıyppul turaǵyna qoıyldy.

«Búgingi kúni megapolıste kólik quraldaryna salynatyn salyq boıynsha bereshek 5 mlrd teńgeden astam somany qurady. Bul rette somanyń negizgi bóligi qozǵaltqysh kólemi 4 myń tekshe sm-den asatyn kólik ıelerine tıesili.

Aıtý kerek, salyq bereshegin «e-Salyq Azamat» mobıldik qosymshasy, Ekinshi deńgeıdegi bankterdiń qosymshalary, memlekettik kirister komıtetiniń www.kgd.gov.kz ınternet-resýrsynda nemese 1414/3 biryńǵaı baılanys ortalyǵy arqyly tekserip, tóleýge bolady», - delinedi habarlamada.

Almaty qalasy boıynsha memlekettik kirister departamenti avtokólik ıelerin qolaısyz jaǵdaı men sot oryndaýshylary jáne aıyppul turaǵynyń qyzmetine shyǵyndanbas úshin salyq bereshekterin ýaqytyly óteýge shaqyrdy.