Almatyda avtokólikti mınýtpen jalǵa beretin servıs ashyldy
ALMATY. QazAqparat - Almatyda «Smart City» jobasy aıasynda ıtalıandyq ınvestıtsııa esebinen elimizdegi eń iri «Anytime» karsherıng-servısi ashyldy, dep habarlaıdy QazAqparat tilshisi.
Jumys sapary kezinde megapolıs ákimi Baýyrjan Baıbek avtomobıldi mınýt saıyn jalǵa alýǵa bolatyn jańa jobamen tanysty.
Italıandyq ınvestor Tranı Vınchentsonyń aıtýynsha, bul jobanyń arqasynda qala turǵyndary ýaqyty men qarjysyn únemdeıdi.
«Almatyda jaıaý júrginshi ınfraqurylymy jańaryp jatyr. Kólik reformasy júzege asýda. Bizdiń mobıldi qosymshamyz arqyly bos turǵan avtomobılge aqy tólep, almatylyq aglomeratsııa aýmaǵynda kólikti tıimdi paıdalanýǵa bolady. Servıs klıentteri kólikke maı quımaıdy, jýmaıdy, turaqqa aqsha tólemeıdi, belgili bir jerge qaldyryp kete almaıdy», - dedi Tranı Vınchentso.
Mysaly, jalǵa alǵan kólikpen tek qala ishinde ǵana emes, qala syrtyna Medeýge, Úlken Almaty kóline, tipti Qapshaǵaıǵa deıin barýǵa bolady. Avtomobılde avtomatty qosylǵysh, artqy kórinisti kórsetetin kamera, navıgator jáne klımat retteýshi bar.
Qazirgi kezde jobaǵa 4 mıllıon evro ınvestıtsııa salynǵan. «Volkswagen Polo» markaly 100 avtomobıl daıyn tur.
Jańa jobanyń arqasynda jumys oryndary ashylady.
«Almatyda ortasha jalaqysy 300 myń teńge bolatyn 50 jergilikti maman jumysqa tartyldy. Jas ári óte daryndy, «Bolashaq» baǵdarlamasynyń túlegi, kezinde «Uber» kompanııasynda istegen Muhıt Seıdahmetovty erekshe atap ótkim keledi. Ol meniń orynbasarym, barlyq óńirlerdegi bıznestiń damýyna jaýap beredi. Almatyda qalany transformatsııalaý aıasynda jaıaý júrginshi jáne velosıped ınfraqurylymy jasalǵandyqtan kelesi jyldan bastap elektrli samokattar servısin ashýdy qarastyratyn bolady», - dedi ınvestor.
Aıta keterligi, jaqynda Almaty kólik júıesin keshendi reformalaǵany úshin aqyldy qalalardyń Eýropalyq forýmynyń joǵary marapatyna ıe boldy. Jyl sońyna deıin qoǵamdyq kóliktiń úlesin 80%-ǵa jetkizý josparlanǵan.
