Almatyda avtokólik aınasyn urlaýdy kásip etken eki nashaqor ustaldy
ALMATY. 23 jeltoqsan. QazAqparat /Erlik Erjanuly/ - Almatyda «Almagúl» yqsham aýdanyndaǵy úılerdiń 32 jastaǵy turǵyndary Denıs pen Semen qylmys ústinde ustaldy.
Buryn birneshe ret qylmystyq jaýapkershilikke tartylǵan olar esirtki úshin jazalaryn ótep shyqqan kórinedi.
«Bul eki azamat bala kezderinen birge ósken. Eki dos qymbat kólikterdiń syrtqy aınalaryn urlaýdy kásip etken. Ózderiniń qylmystyq áreketterin olar tún qarańǵysynda júzege asyrǵan. Kóshe boıynda qańtarylǵan kólikterdiń aınasyn urlap, ony saýdalap aqshasyna esirtki alyp júrgen»,- deıdi qalalyq ishki ister departamentiniń Sholǵynshy polıtsııa polkiniń komandıri Nurjan Nurǵalıev. Olardy Gagarın dańǵylynyń boıynda qańtarylǵan «Mersedes» avtokóliginiń aınasyn urlaý kezinde, osy mańaıdy sholyp júrgen «Boran-026» ekıpajy quryqtaǵan. Oqıǵa ornyna kelip jetken jedel tergeý toby aıǵaq zattardy tárkilep, qylmystyq iske tirkedi. Qazirgi tańda Bostandyq aýdandyq ishki ister bóliminiń qyzmetkerleri olardyń osy ispettes basqa da qylmystarǵa qatystylyǵyn tekserýde. Ýaqytsha oqshaýlaý ortalyǵyna qamalǵandar óz kinásin tolyǵymen moıyndap otyr.
