Almatyda avtokólik aınalaryn urlaýmen aınalysatyn top ustaldy
ALMATY. QazAqparat –Almatyda avtokólik aınalaryn urlaǵan top ustaldy, dep habarlaıdy QazAqparat tilshisi.
Almaty qalalyq Polıtsııa departamentiniń baspasóz qyzmetiniń málimetinshe, jol talǵamaıtyn qymbat kólikterdiń aınasyn urlaýǵa jáne satýǵa mamandandyrylǵan eki adam ustaldy.
«Arnaıy mamandardyń kúshimen buryn múliktik qylmys jasaǵany úshin birneshe ret sottalǵan 1986 jyly týǵan azamat ustaldy. Ol qala aýmaǵynda avtokólik aınalaryn urlaýmen aınalysqan jáne belgili bolǵandaı, olardy «Kar sıtı» saýda úıinde satatyn orny bar satýshyǵa satqan. Jedel is-sharalar barysynda urlanǵan zattardy satyp alýshy - 1985 jyly týǵan T.esimdi azamatta ustaldy. Búgingi tańda 6 elıtalyq kólikten, negizinen «Toyota Land Cruiser 200» markaly jol talǵamaıtyn kólikterden aına urlyǵyna «qylmystyq dýettiń» qatysy bar ekendigi anyqtaldy. Satyp alýshy urlanǵan múlikti óziniń jumys ornynda satatyn bolyp shyqty. Aıǵaqty zattar alyndy jáne qylmystyq isterdiń materıaldaryna qosa tirkeldi», – dedi Almaty qalalyq Polıtsııa departamenti krımınaldyq polıtsııa basqarmasynyń bastyǵy Erkin Іńkárov.
Qazirgi ýaqytta, kúdiktiler qamaýǵa alyndy. Olardyń ústinen QR QK-niń 188 jáne 196-baptary boıynsha qylmystyq is qozǵaldy.
Jyl basynan beri shaharda aına urlyǵy 2,3 esege azaıǵan. Búıirlik aınalardy urlaýmen aınalysqan 17 adam ustaldy, urlanǵan taýarlardyń taǵy 41 satyp alýshysy qylmystyq jaýapkershilikke tartyldy.
