Almatyda avtoHQO-da jańa GPS júıesi bar avtodrom iske qosyldy
«Azamattarǵa arnalǵan úkimet» memlekettik korporatsııasy Basqarma tóraǵasynyń birinshi orynbasary Súıenish Ábdildınniń aıtýynsha, «Saıaly» shaǵyn aýdanyndaǵy mamandandyrylǵan HQO – Qazaqstanda alǵashqylardyń biri bolyp ashylǵan ortalyq. 9 jyldyń ishinde manevrlar men emtıhan tapsyrýshylardyń qozǵalysyn tirkeıtin jabdyq eskirdi, avtodromǵa jóndeý ǵana emes, kúrdeli jańǵyrtý qajet.
«Buryn datchıkter bamperdiń astyna ornatylatyn, eger kólik bordıýrge soǵylsa, ol birden isten shyǵatyn. Endi qajetti jabdyqtar salonnyń ishine qoıyldy. Sondyqtan jeńil soqtyǵys bolsa da, kólik qozǵalysy týraly aqparat esh aqaýsyz joldanady», – dedi Súıenish Ábdildın.
Jańa júıeniń arqasynda Almaty qalasynyń №1 mamandandyrylǵan HQO avtodromy kúnine 100-ge jýyq kýrsantty qabyldaıdy dep josparlanýda.
Aıta keteıik, Almaty qalasynda júrgizýshi kýáligin aýystyrýǵa bolatyn jáne kólikti qaıta tirkeý qyzmetin kórsetetin bes mamandandyrylǵan HQO jumys isteıdi.
«Saıaly» jáne «Kemel» shaǵyn aýdandaryndaǵy avtoortalyqtarda praktıkalyq emtıhan qabyldaıtyn avtodromdar bar.
2021 jyly Almaty qalasyndaǵy mamandandyrylǵan HQO-lar arqyly 847 881 qyzmet kórsetildi. Onyń ishinde: kólikti qaıta tirkeý – 652 840, júrgizýshi kýáligin berý – 187 888.
2022 jyldyń qańtar aıynda Almaty Mamandandyrylǵan HQO-lary 95 898 qyzmet kórsetti. Onyń ishinde: kólikti qaıta tirkeý – 76631, júrgizýshi kýáligin berý – 37 288.
