Almatyda avtobýstyń ne sebepti órtengeni belgili boldy
ALMATY. QazAqparat - Almatyda órtengen avtobýstyń paıdalaný merzimi aıaqtalyp qalǵan. Bul týraly qalalyq mobıldilik basqarmasy málim etti, dep habarlaıdy QazAqparat tilshisi.
Basqarma taratqan málimetke sáıkes, 131-shi avtobýstyń júrgizýshisi tehnıkalyq aqaýlyqty baıqap, nusqaýlyqqa saı áreket jasaǵan. Ol qoǵamdyq kólik ishindegi jolaýshylardy eskertip, bárin aıaldamada túsirgen.
Keıin avtobýstaǵy aqaýdy joıý úshin avtoparkke bet alǵan. Jolda qozǵaltqysh bóliginen órt shyqty.
«Aıta keterligi, otqa oranǵan avtobýstyń normatıvtik paıdalaný merzimi aıaqtalyp qalǵan. Avtoparktiń tehnıkalyq jaı-kúıin josparly tekserý kezinde «Lıaz» markaly avtobýstardyń tozýy joǵary ekeni anyqtaldy. Sondyqtan kórsetilgen kólik qyzmetterdiń sapasyn jáne jolaýshylardyń qaýipsizdigin arttyrý úshin avtopark eski kólikterdi aýystyrý úshin jańa jyljymaly birlikterdi satyp alý josparda»,- dep habarlady basqarmadan.
Eske salaıyq, búgin Almatyda tańǵy saǵat 8-der shamasynda jolaýshylar avtobýsy órten bolatyn.
