Almatyda avtobýstarǵa gaz quıý beketteri jetpeı jatyr

ALMATY. QazAqparat – Almaty qalasynda jolaýshylar avtobýsyna janarmaı quıý beketteri jetkiliksiz. Saldarynan qoǵamdyq kólik júrgizýshileri stantsııalarda tańǵy 04:00-ten bastap kezek kútedi, dep habarlaıdy QazAqparat tilshisi «Atameken» UKP saıtyna silteme jasap.

Kásipkerler palatasynyń málimetinshe, búginde Almaty qalasynda avtobýstarǵa gaz quıý úshin jabdyqtalǵan 7 stantsııa bar.

«Stantsııalar tolyq qýatynyń tek 20 paıyzymen (tozýǵa baılanysty) ǵana jumys istep tur jáne kúnine 650-den astam qalalyq jolaýshylar avtobýsyna (250-den astamy ákelingen, alaıda Almaty ákimdigi qozǵalys marshrýtyn usynbaýyna baılanysty paıdalanylmaı tur) qyzmet kórsetedi. Qyzmet kórsetýdiń uzaqtyǵyna baılanysty júrgizýshilerge yńǵaısyzdyq týyp otyr. Júrgizýshiler gaz quıý úshin tańerteńgi saǵat 04:00-den bastap kezekke turýǵa májbúr. Saldarynan kóptegen júrgizýshi jumystan shyǵyp, ózge salalarǵa ketip jatyr», - dep habarlady kásipkerler palatasynan.

Bıznes ókilderi máseleniń sheshimi retinde gaz quıý beketterin ashý úshin jer ýchaskelerin berýdi surap otyr.

«Beketter ashý maqsatynda jer ýchaskelerin bólý jumystary jergilikti atqarýshy organǵa júktelgen. Alaıda, josparly is-sharalar qazirgi ýaqytta tómen qarqynmen júrip jatyr. Bul salalardyń ózara úılesimde jumys istemegenimen jáne memlekettik organdardyń qyzyǵýshylyǵynyń tómendigimen baılanysty», - dedi «Atameken» UKP ákimshilik kedergilerdi azaıtý jónindegi bólim basshysy Nurbol Ásherbekov.

Kásipkerler palatasy aqparatyna qaraǵanda, Almaty qalasynda gaz quıý beketterin salý «QazaqGaz» kompanııasyna júktelgen. Degenmen Almaty qalasy ákimdigi jer telimderin bólýge jáne ınjenerlik kommýnıkatsııalardy tartý jumystaryn ýaqytyly oryndamaı otyr.

Foto: atameken.kz