Almatyda avtobýsqa soǵysqan Mersedes júrgizýshisi es-tússiz jatyr
ALMATY. QazAqparat - Almatyda avtobýs pen Mersedes kóliginiń soqtyǵysýynan zardap shekken adamdardyń jaǵdaıy týraly dərigerler aıtyp berdi, dep habarlaıdy QazAqparat tilshisi.
Dərigerlerdiń aıtýynsha, apat bolǵan jerden 4 adam 7-shi qalalyq aýrýhanaǵa jetkizilgen.
«Tańǵy 9-dan bastap zardap shekkender tolyq qabyldaý bólimshesinde em sharalarynan ótti. Úsh adam ambýlatorııalyq emge joldama aldy. Olar jeńil jaraqatpen túsken. Al Mersedes júrgizýshisi aýyr jaǵdaıda es-tússiz jatqan kúıinde jetkizildi. Mıdyń ashyq jaraqaty, keýde qýysynyń aýyr jaraqatymen tústi. Kele salysymen oǵan ota jasaldy. Іshine ketken qan toqtatyldy. Qazirgi jaǵdaıy aýyr dep baǵalanyp otyr. Patsıent jansaqtaý bóliminde jasandy tynys alý apparatynda jatyr»,- dedi 7 aýrýhananyń qabyldaý bóliminiń meńgerýshisi Ǵazız Tólepbergenov.
Qalalyq densaýlyq saqtaý basqarmasynyń baspasóz qyzmeti habarlaǵandaı, oqıǵa ornyna 6 jedel jərdem brıgadasy shyqqan.
«Sonymen qatar, ortalyq aýrýhanaǵa eki adam tústi. Aýrýhana dərigerleri patsıentterdi tekserip, olardy ambýlatorııalyq em qabyldaýǵa úıine qaıtardy. Sonymen qatar, Perınatalogııa jəne balalar kardıohırýrgııasy ortalyǵyna jetkizilgen júkti kelinshek te aýrýhanaǵa jatýdan bas tartty»,- dedi baspasóz qyzmetinen.
Aıta ketý kerek, oqys oqıǵa búgin Abaı Saın kóshesinde bolǵan edi. Nómiri 38-shi avtobýs pen Mersedes kóliginiń soqtyǵysýynan 10 adam zardap shekken.
