Almatyda avtobýs júrgizýshisiniń kesirinen bala jaraqat aldy
ALMATY. QazAqparat - Almatyda jol erejesin buzǵan № 118 avtobýs júrgizýshisiniń kesirinen bala jaraqat aldy, dep habarlaıdy QazAqparat tilshisi.
Jol oqıǵasy Nazarbaev pen Abaı kóshesiniń qıylysynda bolǵan.
№118 avtobýstyń júrgizýshisi jol boıynda kele jatyp, kóliktermen jolǵa talasqan.
Bul týraly almatylyq áıel Feısbýktegi paraqshasynda jazdy.
«Memlekettik nómiri BF 433 02 bolatyn №118 avtobýs joldaǵy kólikterdiń aldyn orap otyrdy. Meniń týysqanym, 9 jastaǵy bala artqy orynda otyrǵan bolatyn. Kólik kenetten toqtaǵanda, ol aldyńǵy oryndyqqa qatty soǵylǵan. Saldarynan balanyń murnynan qan ketti. Bala qaýipsizdik beldigin taǵyp otyrǵan. Men kólikten túsip, sóıleskim kelip edi. Júrgizýshi esikti ashpady», - dedi Ásel Esqoja.
Kólikte 11 aılyq bala men anasy bolǵan.
Green Bus JShS dırektory Baýyrjan Kýlıshev atalǵan oqıǵaǵa baılanysty túsinikteme berdi.
«Kólik júrgizýshisi seısenbige deıin jumystan shettetiledi. Eger ereje buzý deregi rastalsa, onyń áreketi tártiptik keńeste qarastyrylatyn bolady. Júrgizýshige sógis jarııalanady. Eger 3 sógis alatyn bolsa, jumystan qýylady», - dedi Baýyrjan Kýlıshev.
