Almatyda avtobýs júrgizýshisine qol jumsaǵan er adam qamaýǵa alyndy
ALMATY. QazAqparat - Almatyda avtobýs júrgizýshisine qol jumsaǵan er adam 10 táýlikke qamaýǵa alyndy. Ony qamaýǵa alý týraly qaýlyny Almaty qalasy mamandandyrylǵan aýdanaralyq ákimshilik soty shyǵardy, dep habarlaıdy QazAqparat tilshisi.
Endi usaq buzaqylyq retinde taǵaıyndalǵan ákimshilik jazany Ábdinazarov arnaıy qamaý ornynda óteıtin bolady.
«Ábdinazarov QR Ákimshilik quqyq buzýshylyq týraly kodeksiniń 434-babynyń 1-bóligi boıynsha kináli dep tanylyp, sot qaýlysymen 10 táýlikke qamaýǵa alyndy. Ony qamaýǵa alý merzimi 19 qańtardan bastalady», - delingen sot qaýlysynda.
Eske sala keteıik, 18 qańtar kúni Nıssan kóligin tizgindegen júrgizýshi qoǵamdyq kólikke arnalǵan jolaqqa ótip, jol apatyna sebepker bola jazdaǵan. Onysymen qoımaı, avtobýsty toqtatyp, onyń júrgizýshisine judyryǵyn ala júgirgen. Oqıǵa kýágerleri janjaldy beınege túsirip, Instagram áleýmettik jelisine jarııalaǵan bolatyn. Osydan keıin, sol kúni 18 qańtarda Almaty qalasy ІІD Tergeý bólimi kinálini taýyp alyp, Almaly aýdandyq ІІD-ne jetkizgen. Sol jerde ony QR ÁQBK-niń 434-baby, 1-bóligi boıynsha ákimshilik jazaǵa tartqan bolatyn.
