Almatyda avtobýs júrgizýshisin urǵan jigit ustaldy
ALMATY. QazAqparat - Almatyda kósheniń ortasynda avtobýstyń júrgizýshisin judyryqtaǵan júrgizýshi ustaldy, dep habarlaıdy QazAqparat tilshisi.
Er adam Almaly aýdandyq ІІB jetkizildi.
Bul týraly qalalyq ІІD resmı ókili Saltanat Ázirbek habarlady.
«Ábdinazarov E. Ońtústik Qazaqstan oblysynyń týmasy bolyp shyqty. Oǵan qatysty Ákimshilik kodekstiń 601-baby (jol belgisin buzyp, avtobýs jolaǵyna shyǵyp ketý), 606-baby (apattyq jaǵdaı týǵyzý), 612-babynyń 2-bólimi (kólikti qujatsyz júrgizý) boıynsha ákimshilik is qozǵaldy. Quqyq buzǵan adam 2017 jyldyń mamyrynda 9 aıǵa kólik júrgizý quqyǵynan aırylǵany belgili boldy», - dedi S.Ázirbek.
Sonymen qatar, ustalǵan adam usaq buzaqylyq jasaǵany úshin de ákimshilik jazaǵa tartyldy. Osy úshin 10 AEK kóleminde aıyppul tólep nemese 10 táýlikke qamalýy múmkin.
Іs materıaldary sotqa jiberildi.
Ábdinazarovtyń kóligi aıyp turaǵyna qoıyldy.
Aıta ketý kerek, Nissan tizgindegen er adam men avtobýs júrgizýshisi jolǵa talasyp, janjaldasyp qalǵan.
Eregisken jeńil kólik ıesi jolda toqtaı qalyp avtobýs
júrgizýshisin syrtqa shyǵaryp alyp balaǵattap, betinen urǵan.
Instagramnyń kris_p_almaty pablıginde jarııalanǵan vıdeo áleýmettik jelide qoldanýshylardyń narazylyǵyn týdyrdy.
Olar polıtsııadan bul quqyqbuzýshylyqqa aralasýdy ótindi.
