Almatyda avtobýs júrgizýshileriniń teń jartysy testileýden óte almady
ALMATY. QazAqparat - Almaty qalasynda kólik mamandarynyń biliktiligi ortalyǵynyń ókilderi «Qalalyq kólikti basqarý jáne qyzmet kórsetý mádenıeti» atty halyqaralyq konferentsııasynda qaladaǵy qoǵamdyq kólik júrgizýshilerin attestattaý qorytyndylary týraly baıandap berdi, dep habarlaıdy «QazAqparat» HAA tilshisi.
Almatydaǵy 2100 avtobýs júrgizýshisiniń ishinde bir myńnan astamy kásibı biliktiligin dáleldeı almady.
«Testileý 21-31 qazan kúnderi aralyǵynda ótken, oǵan qoǵamdyq kólik júrgizetin 2100 adam qatysqan. Testileýdiń shektik baly 40 paıyz bolǵan. Odan nebári 800 adam ǵana ótti. Buǵan birneshe faktor septigin tıgizdi dep sanaımyz. Attestattaýǵa qatysqandardyń kóbi 45 jastan asqandar edi. Olardyń kóbi erejelerdi kópten beri qaıtalamaǵan. Budan basqa, keıbir júrgizýshiler kompıýterdi paıdalana almaıdy.
Sondaı-aq olardyń kóbine ýaqyt jetken joq. Biz olarǵa jaýap berý úshin bir mınýt ýaqyt berdik. Júrgizýshi jaǵdaıdy tez túsinýi tıis, sebebi adam ómiri keıde birer sekýndqa baılanysty bolady. Testileýden óte almaǵan júrgizýshiler qyzmetten shyǵarylmaıdy, óıtkeni kompıýter adam týraly tolyq aıtyp bere almaıdy. Jyl sońyna deıin taǵy 200 júrgizýshi test tapsyrady», - dedi Almaty qalasyndaǵy Kólik mamandarynyń biliktiligi ortalyǵynyń menedjeri Raýshan Serikjan.
Budan basqa, qoǵamdyq kólik júrgizýshileriniń kóbi qaıta daıarlaýdan ótip, onda jol qozǵalysy erejelerinen basqa júrgizý mádenıeti men ádeptilik sabaqtaryn alýda.
Kólik mamandarynyń biliktiligi ortalyǵy dırektorynyń aıtýynsha, bul joba qaladaǵy kólik salasynyń kadrlyq áleýetin jaqsartýǵa múmkindik berip otyr, sebebi júrgizýshiler tapshylyǵy shamamen 500-700 adamdy qurap otyr.
«Testileý osal tustarymyzdy kórsetti, endi olarmen jumys isteımiz. Attestattaýdy jyl saıyn ótkizý qajet dep sanaımyn. Ol júrgizýshilerimizdiń kadrlyq áleýetin jaqsartýǵa múmkindik beredi. Almaty ákimdiginiń qoldaýymen júrgizýshilerimiz óz kórsetkishterin jaqsartatynyna úmittenemiz», - dedi ol.
