Almatyda avtobýs júrgizýshileriniń kinásinen 1 aıda 35 jol-kólik oqıǵasy boldy - polıtsııa
ALMATY. QazAqparat – Almatyda «Avtobýs» jedel-profılaktıkalyq is-sharasy ótip jatyr. Polıtseıler joldarda jolaýshy tasymaldaıtyn irili-usaqty kólikterdi toqtatyp, tekserip jatyr, dep habarlaıdy QazAqparat tilshisi.
«Aktsııa aıasynda biz avtomobıl kóliginde jolaýshylar men júkti tasymaldaıtyn júrgizýshilerdiń kólik jáne eńbek tártibin jaqsartý, tehnıkalyq aqaýy bar nemese qaıta jabdyqtalǵan jolaýshylar kóligin paıdalaný derekteriniń aldyn alý, sondaı-aq, zańsyz jolaýshylar tasymalynyń jolyn kesý kózdelgen. Bul jumysqa múddeli memlekettik organdardyń da, azamattyq alıanstyń ókilderi de barynsha jumyldyrylǵan», – dedi Almaty qalalyq PD Ákimshilik polıtsııa basqarmasynyń bastyǵy Nurlan Amanbek.
Polıtsııa ókili qabyldanǵan sharalarǵa qaramastan, avtobýs júrgizýshileri jol qozǵalysy erejelerin óreskel buzyp, jol-kólik oqıǵalaryna jol berip jatqanyn atap ótti.
Bir aıdyń ózinde avtobýs júrgizýshileriniń kinásinen 35 jol-kólik oqıǵasy boldy, sonyń saldarynan 2 adam qaza taýyp, taǵy 38 adam jaraqat alǵan.
«Búginde Almatyda jolaýshylar tasymalymen aınalysatyn qalalyq avtokólik kásiporyndarynyń sany aıtarlyqtaı qysqarǵanyn aıta ketken jón. Alaıda olardyń basshylary tarapynan jol qaýipsizdigin qamtamasyz etý boıynsha tıisti sharalar qabyldanbaı otyr, sondaı-aq Qazaqstannyń basqa aımaqtarynan kólik aǵyny joǵary jaǵdaıda júrýge beıimdelmegen, tótenshe jaǵdaılar týǵyzatyn, aýyr zardaptarmen jol-kólik oqıǵalaryn jasaıtyn avtobýs júrgizýshilerin tartady. Osyǵan baılanysty, júrgizýshi quramynyń kólik tártibin tıisti baqylaýda ustamaǵany úshin 4 laýazymdy tulǵa ákimshilik jaýapkershilikke tartyldy», — dedi spıker.
Qazirgi ýaqytta qala syrtyndaǵy joldarda, sondaı-aq qalalar men eldi mekenderde patrýldik polıtsııa narıadtarynyń sany artty. Profılaktıkalyq jáne reıdtik is-sharalar jalǵasýda.
