Almatyda avtobýs jolda otyrǵan adamdy qaǵyp ketti
ALMATY. QazAqparat - Almatyda baǵdarlyq avtobýs jolda otyrǵan er adamdy qaǵyp ketti. Er adam sol jerde qaza tapty, dep habarlaıdy «QazAqparat» HAA tilshisi oqıǵa ornynan.
Oqys oqıǵa Qabanbaı batyr jáne Qarasaı batyr kósheleriniń arasynda Gagarın kóshesinde soltústik baǵytta bolǵan. №81 avtobýs júrgizýshisiniń aıtýynsha, ol Gagarın kóshesimen kele jatqan, al 30-35 jas arasyndaǵy er adam joldyń ortasynda otyrǵan. Qoǵamdyq kólik júrgizýshisi qarańǵyda adamdy birden baıqaı qoımaǵanyn jáne tejeýishti basqan kezde bári kesh bolǵanyn aıtyp, sendirýde.
Er adam alǵan jaraqaty saldarynan oqıǵa ornynda qaza tapqan. Marqumnyń qujaty joq bolyp shyqty. Oqıǵanyń mán-jaıyn Almaty polıtsııasy tekserýde.
