Almatyda avtobýs jolaǵymen júıtkigen Lexus talǵa baryp soǵyldy
ALMATY. QazAqparat - Almatyda Abaı kóshesinde Lexus talǵa soǵylyp, eki adam zardap shekti, dep habarlaıdy QazAqparat tilshisi.
Oqıǵa kýágerleriniń aıtýynsha, Lexus kóligi Abaı kóshesimen batys baǵytta avtobýs jolaǵymen júıtkip kele jatqan. Kólikke ne kedergi bolǵany belgisiz. Júrgizýshi Sinooil janar-jaǵarmaı stansasy tusynda jol shetine shyǵyp ketip, talǵa soǵylǵan.
Oqıǵa ornyna jedel járdem qyzmetkerleri men polıtsııa ókilderi kelip úlgerdi. Kóliktegi jolaýshyny shyǵaryp alý úshin qutqarýshylarǵa kólikti kesýge týra kelgen.
Al kólik júrgizýshisi qaladaǵy aýrýhanalardyń birine jetkizildi.
