Almatyda avtobýs pen trolleıbýstiń soǵylýynan 8 adam japa shekti
ALMATY. QazAqparat - Almatyda avtobýs pen trolleıbýstiń soǵylýynan 8 adam japa shekti. Jol apaty Abaı kóshesiniń boıynda Baıtursynov pen Masanchı kósheleri arasyndaǵy aıaldamada bolǵan.
№128 baǵdardyń avtobýsy aıaldamada turǵan №11 trolleıbýsty qaǵyp baryp toqtaǵan.
Saldarynan 8 adam ortasha dárejedegi dene jaraqattarymen medıtsınalyq kómekke júgindi.
«Olardyń birine medıtsınalyq kómek sol jerde kórsetildi. 5 adam №7 qalalyq aýrýhanaǵa jetkizildi. Olardyń ishinde 1 adam mıy shaıqalǵan, ol neırohırýrgııa bólimine jatqyzyldy. Basqasyna qabyldaý bóliminde kómek kórsetilip, úılerine qaıtaryldy. 2 adam Ortalyq klınıkalyq aýrýhanaǵa jetkizildi. Mamandardyń qaraýynan soń olar da úılerine jiberildi», - dedi qalalyq densaýlyq saqtaý basqarmasynyń baspasóz qyzmeti.
Eske sala ketsek, keshe 22 maýsymda Seıfýllın men Tobaıaqov kósheleriniń qıylysynda eki avtobýs soqtyǵysqan bolatyn. Jol apatynan birneshe adam zardap shekti.
