Almatyda avtobýs pen birneshe avtokólik soqtyǵysty
ALMATY. QazAqparat - Almatyda keshe túnde birneshe avtokólik soqtyǵysyp qaldy. Apat saldarynan 8 adam zardap shekti, dep habarlaıdy QazAqparat tilshisi.
Polıtsııanyń habarlaýynsha, jol-kólik oqıǵasy 25 qyrkúıekte keshki saǵat 22:40-ta Almaty qalasynyń Jetisý aýdanynda oryn alǵan.
«BMV kóliginiń júrgizýshisi, 1996 jyly týǵan A. Rysqulov dańǵylymen batys baǵytta kele jatyp, jol boıynda belgisiz kólikpen soqtyǵysqan. Odan keıin «BMV» joldyń qarsy baǵytyna ótip ketip, aq tústi «Toyota» avtokóligine soǵylǵan. Keıin shyǵysqa qaraı kele jatqan «LIAZ» avtobýsymen soqtyǵysqan. Sonda da toqtamaı, ári qaraı kete bergen «BMV» kóligi batys baǵytta kele jatqan eki «Toyota Camry» kóligimen soqtyǵysty», - dep túsindirdi Almaty qalalyq PD.
Jol apaty saldarynan segiz adam zardap shekti, onyń bireýi - bala.
Atalǵan fakti boıynsha QR QK 345-babynyń 1-bóligi boıynsha sotqa deıingi tergeý bastaldy. Óndiris aıasynda tıisti saraptama taǵaıyndalady.
