Almatyda avtobýs birneshe kólikti soqty
ALMATY. QazAqparat – Almatyda qoǵamdyq kólik jappaı jol apatyn jasady, dep habarlaıdy QazAqparat tilshisi.
Jol-kólik apatynyń vıdeosy áleýmettik jelilerde paıda boldy. Onda avtobýstyń jol boıynda turǵan kólikterdi soǵyp baryp toqtaǵanyn kórýge bolady. Birneshe kólik zaqymdanǵan.
Almaty qalalyq Polıtsııa departamentiniń baspasóz qyzmetinen málim etkendeı, jol apaty 20 qazan kúni tańǵy saǵat 05:50-de bolǵan.
«Qoǵamdyq kólikti 1982 jyly týǵan E. esimdi júrgizýshi basqarǵan. Ol Mustafın kóshesimen soltústik baǵytta, «Orbıta-1» yqshamaýdanyndaǵy №21 úıge qarama-qarsy toqtaǵan kezde, avtobýstyń ózdiginen qozǵalýyna jol bergen. Saldarynan qoǵamdyq kólik joldyń shetinde turǵan birneshe avtokólikke baryp soqtyǵysty. Qazirgi ýaqytta Bostandyq aýdandyq polıtsııa basqarmasy atalǵan faktini tirkeýge alyp, tergeý jumystary júrgizilýde. Zardap shekkender joq»,– dep habarlady polıtsııadan.
