Almatyda avtobýs aıaldamasynda 3 adamdy qaqqan júrgizýshi sottaldy
ALMATY. QazAqparat - Almatyda avtobýs kútip turǵan úsh adamdy kóligimen qaǵyp ketken 32 jastaǵy júrgizýshi Aleksandr Tıpıkın alty jyl, segiz aıǵa sottaldy, dep habarlaıdy QazAqparat tilshisi.
Ol jazasyn qaýipsizdigi ortasha mekemede óteıdi. Sondaı-aq, Aleksandr Tıpıkın 10 jylǵa kólik júrgizý quqyǵynan aıyryldy. Eki aıdyń ishinde ol qaıtys bolǵan eki áıeldiń otbasyna 2 mln teńge moraldyq ótemaqyny óteýge tıis. Jaraqat alǵan er adam úshin moraldyq shyǵyn kólemi - 500 myń teńge .
Budan buryn Aleksandr Tıpıkın Almaty qalasynyń Medeý aýdandyq sotynda «Toyota Corolla» kóligin mas kúıinde jáne júrgizýshi kýáliginsiz júrgizgenin aıtqan bolatyn. Ol Táttibekov kóshesinde «Renault Duster» avtokóligine soqtyǵysyp, avtobýs aıaldamasyna qaraı ushyp ketken. Sóıtip aıaldamada turǵan úsh adamdy qaqqan. Rýza Esimhanova men Mereke Ábenova aýyr jaraqattan qaıtys boldy.
Aıta keteıik, jol apaty 16 naýryzda kúndizgi birler shamasynda Medeý aýdanynda bolǵan. «Toyota Corolla» avtokóliginiń júrgizýshisi Táttibekov jáne Kopernık kóshesiniń qıylysynda «Renault Duster» avtokóligimen soqtyǵysyp, avtobýs aıaldamasynda turǵan úsh adamdy qaǵyp ketti. Nátıjesinde 31 jastaǵy áıel sol jerde kóz jumdy. Ekinshi kelinshek aýrýhanada qaıtys boldy. Al, Manarbek Toǵjanovtyń aıaǵy synyp aýrýhanaǵa jetkizildi.
