Almatyda avtobýs aýdarylyp qaldy
ALMATY. QazAqparat - Almatyda Saıahat avtovokzaly men Talǵar arasynda qatynaıtyn jolaýshylar avtobýsy aýdarylyp qaldy, dep habarlaıdy QazAqparat.
Oqıǵaǵa qatysty qalalyq mobıldilik basqarmasy túsinik berdi.
«Jol apaty búgin saǵat 14:27-de boldy. Qala mańyna qatynaıtyn №203 baǵyttaǵy avtobýs (memlekettik nómiri - 132) Talǵar trassasynda soltústikti betke alyp kele jatqanda júrgizýshi dál aldyna kelip tejegishin basqan jeńil kólikpen soqtyǵyspas úshin manevr jasaǵan. Saldarynan avtobýs aýdarylyp, ózenge qulap ketti. Eki adam jeńil jaraqat alǵan. Jedel járdem shaqyryldy», - dep málim etti basqarmadan.
Aıta keteıik, qala men qala mańyndaǵy aýyldardy baılanystyratyn bul baǵdar ótken jyldyń jeltoqsanynda iske qosylǵan bolatyn.
