Almatyda avtobýs apatyna kináli júrgizýshige qatysty sot úkimi shyqty

ALMATY. QazAqparat – Almatyda adam ólimine ákep soqqan jol apatyna kináli № 98 avtobýs júrgizýshisine qatysty sot úkimi shyqty, dep habarlaıdy QazAqparat tilshisi.

Almaty qalasy Almaly aýdandyq sotynda QR Qylmystyq kodeksiniń 345-babynyń 3-bóligi (abaısyzda adam ólimine ákep soqtyrǵan jol qozǵalysy erejelerin buzýy) boıynsha A.-ǵa qatysty qylmystyq is qaraldy.

Sot anyqtaǵandaı, 2022 jyly 8 qarasha kúni saǵat 14:00 shamasynda sottalýshy A., Abylaı han kóshesiniń boıymen ońtústik baǵytta No98 avtobýsty basqaryp, Abylaı han jáne Tóle bı kósheleriniń qıylysynda jol qozǵalysy erejesin elemeı, baǵdarshamnyń tyıym salynǵan qyzyl túsine ótip, Tóle bı kóshesimen kele jatqan №201 avtobýspen soqtyǵysqan.

Jol-kólik oqıǵasynyń saldarynan No98 avtobýstyń jolaýshylary dalaǵa ushyp ketti, jábirlenýshi I. avtobýs astynda qalyp, alǵan jaraqatynan qaıtys boldy. Eki adam K. jáne Sh. ártúrli dene jaraqatyn aldy.

Sot otyrysynda sottalýshy kinásin moıyndaǵan joq, ózin aqtaýdy surady. Sot aıyptalýshynyń 3 kishkentaı balasy baryn jáne kánisin jeńildetetin jaǵdaılardy eskerip, ony eki jarym jylǵa bas bostandyǵynan aıyrdy. Sonymen qatar A. 5 jylǵa kólik quralyn basqarý quqyǵynan aıyryldy. Budan bólek, Sh. jáne K.-nyń paıdasyna moraldyq shyǵyn retinde 2 mln teńge, Sh.-nyń paıdasyna 323 885 teńge materıaldyq shyǵyn óndirildi.

Sot úkim zańdy kúshine engen joq.

Eske salaıyq, byltyr 8 qarasha kúni Almatyda Tóle bı – Abylaı han kósheleriniń qıylysynda eki avtobýs soqtyǵysqan bolatyn. Jol apaty saldarynan 1 adam kóz jumyp, 21 adam zardap shekken.

Sondaı-aq avtobýs apatyna qatysy bar júrgizýshi 2022 jyldyń 11 qarashasynda qamaýǵa alynǵan bolatyn.

Osy jyldyń aqpan aıynda avtobýs apatyna kináli júrgizýshiniń isi sotqa joldanǵan edi.