Almatyda aýylsharýashylyq jármeńkeleri turaqty ótip turady

ALMATY. QazAqparat - 22 qańtardan bastap apta saıyn Almaty qalasynyń 5 aýdanynda (Almaly, Medeý, Bostandyq, Alataý, Áýezov) senbi-jeksenbi kúnderi azyq-túlik jármeńkeleri ótedi. Bul týraly brıfıng barysynda qala ákiminiń orynbasary Maqsat Qıqymov aıtty, dep habarlaıdy QazAqparat tilshisi.

Onyń aıtýynsha, Almaty qalasy men Qazaqstan óńirleriniń óndirýshilerinen azyq-túlik jetkizýdiń barlyq arnasy qalpyna keltirildi.

Qala boıynsha azyq-túlik taýarlarynyń tapshylyǵy baıqalmaıdy.

«Erteńnen bastap apta saıyn Almaty qalasynyń 5 aýdanynda (Almaly, Medeý, Bostandyq, Alataý, Áýezov) demalys kúngi azyq-túlik jármeńkeleri qaıta bastalady. Oǵan Almaty oblysynyń jaqyn aýdandarynan aýylsharýashylyq taýaryn óndirýshiler, sondaı-aq Almaty qalasynyń azyq-túlik kásiporyndary qatysady», - deıdi Maqsat Qıqymov.

Spıkerdiń sózinshe, áleýmettik mańyzy bar azyq-túlik taýarlaryna baǵany ustap turý boıynsha sharalar qabyldaý qala ákimdigi jumysynyń basym baǵyttarynyń biri.

«Áleýmettik mańyzy bar azyq-túlik (ÁMAT) taýarlarynyń baǵasyn ustap turý úshin birqatar júıeli jáne jedel sharalar qabyldanady. Qalanyń saýda núktelerine tómendetilgen baǵamen tikeleı jetkizý úshin ÁMAT óndirýshilerimen 19 memorandým jasaldy»,- deıdi ol.

Budan basqa, maýsymaralyq kezeńde baǵany turaqtandyrý úshin 2021 jylǵy qyrkúıekten 2022 jylǵy sáýirge deıin «Magným» saýda jelisinde «forvardtyq» satyp alý sheńberinde 22 myń tonna kókónis satý júrgizilýde. Almaty qalasy boıynsha Básekelestikti qorǵaý jáne damytý departamentimen birlesip ÁMAT-qa saýda ústemesiniń 15% saqtalýyn baqylaý boıynsha jumys jolǵa qoıyldy»,- deıdi Almaty ákiminiń orynbasary.

Sonymen qatar, ol ÁMAT baǵasyn turaqtandyrý boıynsha jumys erekshe baqylaýda ekenin jetkizdi.