Almatyda aýyl muǵaliminiń jeke sýret kórmesi ótedi
ALMATY. Aqpannyń 5-i. QazAqparat /Erlik Erjanuly/ - Almatyda aqpannyń 9-y kúni Almaty oblysy Raıymbek aýdany Narynqol aýlyndaǵy mekteptiń muǵalimi Almas Syrǵabaevtyń "Qarlyǵashym, keldiń be?" dep atalatyn poetıkalyq sýret kórmesi ótedi,
dep habarlaıdy QazAqparat.
Bul shara aqıyq aqyn Muqaǵalı Maqataevtyń rýhyna arnalyp otyr. Ony uıymdastyrýǵa qoldaý kórsetkender Qazaqstan Jazýshylar odaǵy men «Qalamger-Medıa» ortalyǵy. Qazaqtyń Abaı atyndaǵy memlekettik pedagogıkalyq ýnıversıtetiniń túlegi Almas Bolathanuly buǵan deıin respýblıkalyq «Ulan», «Baldyrǵan» basylymdarynda sýretshi bolyp, birqatar aqyn-jazýshylardyń kitaptarynyń bezendirýshisi bolǵan. Qazirgi tańda Hantáńiri baýraıyndaǵy Narynqol aýylyndaǵy mektepte jas urpaqty sýret óneriniń qyr-syryna baýlyp júr. Qylqalam sheberi 2007 jyly Muqaǵalıdyń «Raıymbek, Raıymbek!» poemasynyń jelisi boıynsha serııaly grafıkalyq sýretter jınaǵyn kitap etip shyǵardy. Sýret ónerindegi shyǵarmashylyq izdenisteri talǵampaz óner súıer qaýymnyń ystyq iltıpatyna ıe bolǵan, jas darynnyń shyǵarmalary 1998 jyly Astanada ótken halyqaralyq «Shabyt» festıvalinde jáne 2005 jyly Jeńistiń 60 jyldyǵynda kórsetildi. Sondaı-aq 2007-2008 jyldary Taldyqorǵan qalasynda jeke kórmesin ótkizgen edi. Endi poezııa qulageriniń týǵan kúnine oraı ol óz shyǵarmashylyǵyn Almatyda qala turǵyndary men qonaqtarynyń nazaryna usynbaq. Qazaqstan Jazýshylar odaǵynyń Ádebıetshiler úıinde ótetin bul kórmeniń jumysy bir aptaǵa sozylmaq. Oǵan Almastyń 50-den astam jańa týyndylary qoıylady dep josparlanyp otyr.
