Almatyda aýtızmi bar balalar fýtbol oınady
Aýtızmge shaldyqqan balalar ózara dop tebýden baq synasty.
«Álemde aýtızmdi jeńý óte qıyn. Biraq biz óz balalarymyzdyń ómirin kórsete otyryp, ony jeńýge bolatynyn kórsetkimiz keledi. Bul jaqyndarynyń mahabbaty men qoldaýynyń arqasynda ǵana múmkin bolmaq», - dedi «DOM» qoǵamdyq qorynyń dırektory Arýjan Saın.
«Aýtızmdi jeńemiz» jobasy óz jumysyn 2013 jyly Aýtızmi bar balalar ata-analarynyń Almaty qalalyq qaýymdastyǵy janynda bastady. Osy ýaqytqa deıin 1500 balaǵa kómek kórsetildi. Joba aýtıstıkalyq spektri buzylǵan balalary bar qazaqstandyq otbasylardy qoldaýǵa baǵyttalǵan.
Almatylyq Madına Kenjeǵulovanyń uly Dıas 11 jasta. Bala aýtızmge shaldyqqan. Ol jyl boıy fýtbolmen shuǵyldanady. Dıas buǵan deıin shetelde em alyp júrgen. Qazir em-dom sharalary Qazaqstanda da qoljetimdi.
«Men jobaǵa balamnyń qajettiligi úshin keldim. Osy jobanyń arqasynda kóp jetistikke jettik. Onyń aldynda balam sóıleı almaıtyn, oıyn jetkize almaıtyn. Qazir 3-4 tańbaly sandardy sanaıdy, kóbeıtedi, bóledi. Dıktant jaza alady. Kún saıyn logopedtermen, defektologtarmen sabaq ótemiz», - dedi Madına.
«Aýtızmdi jeńemiz» jobasy balalardy áleýmettik ortada beıimdeýge baǵyttalǵan. Qazir munda 80 bala ońaltý sharalarynan ótip jatyr.
«DOM» qoǵamdyq qory tuńǵysh ret fýtbol sektsııasyn ashty.
«Sport sektsııasyn ashýdaǵy maqsat - aýtızmi bar balalardyń komandalyq oınaý qabiletin arttyrý. Osyǵan deıin «aýtızm» dıagnozy bar balalar komandada oınaı almaıdy degen pikir bolatyn. Bizdiń sport sektsııamyz munyń olaı emes ekendigin kórsetti», - dedi Arýjan Saın.
Autism Speaks halyqaralyq uıymynyń málimetinshe, AQSh-ta «aýtızm» dıagnozy 59 balanyń ishinde 1 balaǵa qoıylady.
«Asyl Mıras» qory habarlaǵandaı, 2018 jyly Qazaqstanda bul dıagnoz 3920 adamǵa qoıylǵan.
