Almatyda aýrýhananyń jansaqtaý bólimi órtenip kete jazdady
ALMATY. QazAqparat – Almatyda dárigerler aýrýhananyń jansaqtaý bóliminen shyqqan órttiń aldyn aldy, dep habarlaıdy QazAqparat Almaty qalasynyń Tótenshe jaǵdaılar departamentiniń baspasóz qyzmetine silteme jasap.
18 shilde kúni saǵat 21:47-de na Almaty qalalyq «101» pýltine Seıfýllın dańǵyly, 492 mekenjaıynda ornalasqan № 1 perzenthananyń balalarǵa arnalǵan jansaqtaý bóliminen órt shyqqany týraly habarlama kelip túsken. Tótenshe jaǵdaılar departamentiniń kúsh-quraldary dereý atalǵan mekenjaıǵa jiberildi.
«Jansaqtaý bóliminde órt sóndirý dabyly iske qosylǵany anyqtaldy. Bul túnde kezekshilik etken aýysym qyzmetkerleri sabyq saqtap, tótenshe jaǵdaı kezinde áreket etýdiń algorıtmine sáıkes sharalar qoldandy. Osylaısha, akýsher-gınekolog dáriger Perızat Sadyqova, balalar medbıkesi Araılym Jıdelıeva jáne basqa da qyzmetkerler jańa týǵan segiz náresteni jansaqtaý bóliminen qaýipsiz jerge shyǵarǵan.
Dárigerlerdiń biri – Vıtalıı Grýshevskıı untaqty órt sóndirý quralyn durys paıdalanyp, elektr symdar júıesiniń aıqas tuıyqtalǵan rozetkadan órtenýiniń aldyn aly. Qyzmetkerlerdiń daǵdylary jalyndy órt sóndirýshiler kelgenshe tolyq sóndirýge múmkindik berdi», - dep habarlady vedomstvodan.
Qalalyq Tótenshe jaǵdaılar departamenti aýrýhana basshylyǵy men medıtsına qyzmetkerlerine qyraǵylyq tanytyp, tek medıtsınalyq kómekke emes, basqa jaǵdaıda da kómekke kele alǵany úshin alǵys bildirdi.
Jalyndy sóndirýge atsalysqandardyń barlyǵy nagradaǵa usynylady. Qaza tapqandar men zardap shekkender joq.
