Almatyda aýrýhanaǵa túskenderdiń arasynda vaktsına alǵandar az

ALMATY. QazAqparat- Almatyda vaktsına saldyrǵandar aýrýhana 20 ese az túsedi. Bul týraly qalanyń bas sanıtarlyq dárigeri Jandarbek Bekshın onlaın brıfıng barysynda málim etti, dep habarlaıdy QazAqparat tilshisi.

«Juqtyrý deńgeıi tómendedi, biraq bosańsýǵa bolmaıdy. Pandemııa bastalǵaly COVID-19 ınfektsııasynyń 155 739 rastalǵan jaǵdaıy tirkeldi. Qala áli de «qyzyl» aımaqta. Bizdiń mindet – dertti shekteý sharalaryn qoldaný arqyly tómendetý. Munda bárimiz jaýapkershilik tanytýǵa tıispiz – kásipkerler de, turǵyndar da», - dedi Almaty qalasynyń bas sanıtar dárigeri.

Qabyldanǵan sharalardyń nátıjesinde Almatyda epıdemıologııalyq jaǵdaı turaqtandy.

«Qala turǵyndary arasynda vırýs juqtyrý jaǵdaıynyń tómendeýi 25 tamyzdaǵy 1605 jaǵdaıdan 8 qyrkúıek kúni 976-ǵa deıin tómendedi. Bul tómendeý búginde Almaty turǵyndarynyń 46%-y ımmýndyq qabatynyń qalyptasýyna baılanysty bolyp otyr. Qazirgi ýaqytta koronavırýsqa qarsy kúnine 3 myńǵa jýyq adam vaktsınalanady. Bir aı buryn kúnine 10-12 myńǵa jýyq adamǵa vaktsına alatyn»,- dedi ol.

Búginde vaktsınanyń birinshi komponentin - 899 784 adam, ekinshi komponentin - 779 870 turǵyn aldy.

«Biz vaktsına 100% qorǵamaıtynyn túsinemiz. Alaıda, olardyń «delta» shtamyna qarsy turýy 80%-dan asady. Vaktsınalanǵan almatylyqtar aýrýhanaǵa 20 ese az túsetinin atap ótkim keledi», - dedi Jandarbek Bekshın.