Almatyda aýlasynda qorajaıy bar eki turǵyn úı órtendi
ALMATY. QazAqparat - Almatyda aýladaǵy qorajaılar órtenip jalyn kóppáterli turǵynúıge kóshti.
«12 qazanda saǵat 18:12-de Almaty qalalyq TJD-nyń «101» nómirine Medeý aýdany Cherkassk qorǵanysy kóshesi, 13 meken-jaıynda aýladaǵy qorajaılar órtenip jatqany týraly habar tústi.
Órt sóndirý qyzmeti 8 mınýttan keıin oqıǵa ornyna jetti. «Qutqarýshylar oqıǵa ornyna jetkende jalpy aýmaǵy 1200 tekshe metrdi quraıtyn aýmaqta kóppáterli turǵyn úı, onyń janyna salynǵan bir qabatty kóppáterli turǵyn úı men janyndaǵy bir-birine jaqyn ornalasqan aǵashtan turǵyzylǵan qorajaılar órtenip jatty. 60 adam qaýipsiz jerge shyǵaryldy.
Qyzyl jalyndy sóndirý jalǵasyp jatyr», - dedi Almaty qalasy boıynsha TJD resmı ókili Sandýǵash Baımuhambetova.
Órt sóndirýshiler saǵat 19:20-da otty aýyzdyqtady.
Qala ákimdiginiń qyzmetkerleri kelip úıleri zardap shekken turǵyndardy tizimge alýda. Olardy ýaqytsha turaqjaımen qamtamasyz etý máselesi sheshilýde.
Jergilikti turǵyndardyń habarlaýynsha, órtten joǵary qabattaǵy bir páterde qonaq bólmeniń tóbesi qulap túsken.
Órt sóndirýshilerdiń aıtýynsha, alaý aýyzdyqtalyp, oqshaýlanǵan alaıda áli tolyq sóndirilmegen. Ol tolyq óshirilgen soń ǵana órtten zardap shekken aýdannyń tolyq kólemi belgili bolady.
